Patriku greko-melkit i Damaskut kërkon paqe e demokraci për Sirinë.
Duke kujtuar thirrjen e Papës në lutjen e Engjëllit të Tënzot, uroj që edhe në Siri
të rivendoset sa më shpejt bashkëjetesa paqësore. Janë fjalët e patrikut greko-melkit
të Damaskut, Gregori III Laham, pasi ndoqi me vëmendje e shqetësim, por edhe me mirënjohje
të thellë e shpresë, lutjen e djeshme mariane, që sensibilizoi fuqimisht opinionin
publik për situatën dramatike në Siri. E këtë mirënjohje Patriku i Damaskut
e shpreh edhe në mikrofonin e Radios sonë:
Përgjigje:
- Dëshiroj vërtet t’i them faleminderit Papës për thirrjen e për dashurinë
ndaj Lindjes së Mesme: mblodhi Sinodin e posaçëm për këtë zonë të trazuar të botës,
mbajtur në vitin 2010, një parapërgatitje e vërtetë, për të përballuar situatën e
këtyre muajve, të këtij viti. Edhe ne bashkohemi në lutje me Atin e Shenjtë, në çenakull,
posaçërisht në këtë muaj, që Lindja ia kushton Zojës së Bekuar. I ftuam gjithë të
krishterët të luten çdo ditë në kisha për paqen e pajtimin; madje ftuam edhe vëllezërit
tanë myslimanë të luten me ne, sepse këtë situatë duhet e do ta përballojmë së bashku.
Pyetje:
- Thirrja juaj në këtë çast të vështirë?
Përgjigje: -
Dëshiroj, njëkohësisht me Shenjtërinë e Tij e me zërin e tij kaq të fortë, t’i kujtoj
Evropës, por edhe Amerikës, të punojnë për zgjidhjen e konfliktit izraelito-palestinez,
që do t’i ndihmonte të gjitha vendet arabe për një ardhmëri më të mirë. Besoj se kjo
rrugëzgjidhje ka shumë rëndësi për ne.
Pyetje: - Cilat janë druajtjet,
por edhe shpresat e bashkësisë së krishterë?
Përgjigje: -
Nuk kemi frikë nga Islami, kemi frikë nga kaosi, si në Irak. E duam t’u kujtojmë shtetasve
arabë – të krishterë e myslimanë – në këtë situatë, si në Liban, ashtu edhe në Libi,
në Egjipt, në Oman e në Jemen: “Duajeni njëri-tjetrin!”. Me dashurinë, që ka Zoti
për ne, të krishterë e myslimanë, ne mund ta kapërcejmë këtë krizë e këtë situatë
tragjike të botës arabe e të vijojmë së bashku – të krishterë, myslimanë e arabë –
rrugën e paqes, të progresit, të lirisë e të demokracisë.
Mbi thirrjen
e Papës për Sirinë, të dëgjojmë edhe komentin e nuncit apostolik në vend, imzot
Mario Xenari, në mikrofonin e Radio Vatikanit:
Përgjigje:
- Kujtoj se është hera e dytë që Ati i Shenjtë bën thirrje për situatën
në Siri. Kjo tregon se Papa e ka tepër për zemër këtë zonë të botës lindore. Kujtoj
edhe se Siria, me të drejtë, njihet si “djep i krishterimit”. Pas Jeruzalemit, krishterimi
u përhap menjëherë këtu, në këtë zonë. Kjo tokë në shtatë shekujt e parë, i dhuroi
Kishës gjashtë papë. Duhet kujtuar edhe se Siria ka qenë, e vijon të jetë, vend shembullor
për harmoninë ndërmjet feve, për respektin reciprok ndërmjet shumicës myslimane e
pakicës së krishterë. Ne duam të shpresojmë se kjo klimë mund e duhet të vazhdojë.
Duam, prandaj, të lutemi e të shpresojmë, që të gjindet rruga për t’i dhënë fund gjakderdhjes.
Pyetje: - Papa i bëri thirrje si autoriteteve, ashtu edhe popullsisë,
që të punojnë për rivendosjen e bashkëjetesës. A mund të ndihmojnë krijimi i shumë
partive e njoftimi për zgjedhjet në këtë drejtim?
Përgjigje: -
Natyrisht, duhet që kjo të bëhet në kuadrin e një dialogu kombëtar që, për fat të
keq, has ende shumë pengesa. Shpresojmë se vullneti i mirë nuk do të mungojë. Papa,
me të drejtë, i inkurajon të gjitha palët pikërisht për vullnet të mirë. Sepse duhet
ta kenë këtë vullnet, si autoritetet, ashtu edhe opozita.
Pyetje: -
Cili është kontributi që mund të japë, në këtë situatë, bashkësia e krishterë?
Përgjigje:
- Ndihma e të krishterëve mendoj se duhet të jetë themelore. Më se një
meshtar më ka nxitur të vërej se të krishterët kanë këtë karakteristikë: janë urë
lidhëse ndërmjet etnive të ndryshme, urë, që ndihmon për të gjetur rrugë të reja për
pajtim e harmoni.