Arrijnë në Mogadisho ndihmat e OKB-së, por luftimet vazhdojnë
Vazhdon emergjenca në Somali. Në kryeqytetin Mogadisho mbërriti avioni i parë me ndihmat
e Komisariatit të Lartë të OKB-së për Refugjatët, por në shumë zona vazhdojnë luftimet.
Konflikti ndërmjet trupave qeveritare dhe militantëve islamikë të grupit ekstremist
Shabaab, jo vetëm që i shkakton probleme popullsisë, por bëhet pengesë edhe për shpërndarjen
e ndihmave. Tensioni është i lartë në të gjithë Bririn e Afrikës, ku shpesh kamionët
me ndihma plaçkiten. Të dëgjojmë koordinatoren italiane të projekteve të Vullnetariatit
Ndërkombëtar për Zhvillimin, Gloria Paoluçi, nga Etiopia:
Regjistrojmë
hyrjen e 2 mijë somalezëve në ditë. Kampet e refugjatëve, të hapura në zonën Dolo
Ado, janë mbipopulluar. Javën e kaluar u hap kampi i katërt i refugjatëve e parashikohet
të mbushet në 30-40 ditë. Gjatë viteve të kaluara, njerëzit hapnin puse me dorë e
në thellësinë 10 metra gjenin ujë. Këtë vit, është e domosdoshme të arrihet në 20
metra e kjo nuk është e lehtë. Shumë organizata humanitare patën dhënë alarmin para
se fillonte emergjenca, por nuk u dëgjuan. Tani, ndihmat janë të kufizuara, edhe për
shkak të bllokimit të tyre nga milicitë Shabaab.