Беларусь: “мадрыдская моладзь” атрымала благаслаўленне на падарожжа
Сёння ў Івянцы, што
недалёк ад Валожына, не спалі ўсю ноч. Трохдзённы марафон – ІІ Агульнабеларуская сустрэча
моладзі – падышоў да завяршэння. Паўночны канцэрт “Музычнай майстэрні”, потым начное
чуванне ў касцёле, і ўжо раніцай – Святая Імша. Падчас яе Мітрапаліт Мінска-Магілёўскі,
Апостальскі Адміністратар Пінскай дыяцэзіі арцыбіскуп Тадэвуш Кандрусевіч заклікаў
моладзь быць людзьмі моцнай веры. Прыслухацца да слоў Святога Айца Бэнэдыкта XVI і
адкрыць нанава прыгажосць веры, быць сучаснымі і адначасова вернымі свайму хрысціянскаму
пакліканю. І гэта – пэўны шлях да шчасця.
Праграма форуму ў гэтым годзе была
насычанай і, падводзячы вынікі, можна сказаць, што ўсе пункты былі выкананы. Напярэданні
прайшлі дзве важныя падзеі, якія склалі “змястоўнае насычэнне” сустрэчы. Па-першае,
круглыя сталы. Тэмы іх былі разнастайныя, але выключна тыя, якія хвалююць сучасную
моладзь: акультызм, секты, Касцёл і сродкі масавай інфармацыі, Касцёл і мастацтва.
Дарэчы, вызначыліся і былі ўзнагароджаны пераможцы фотоконкурсу “Чалавек – Божае стварэнне”.
Вялікі рэзананс атрымаў дыялог біскупаў з удзельнікамі сустрэчы. Пытанні моладзь дасылала
па электроннай пошце. Размова атрымалася цікавай і змястоўнай – ад выдання літургічных
кніг да стаўлення Касцёла да гамеапатычных лекаў. Мэта сёлятняга форума і была дасягнута:
не толькі адчуць яднанне аднадумцаў, адпачыць душой, але і знайсці адказы на свае
пытанні.
На прыканцы сустрэчы была асвечана фігура Яна Паўла ІІ, удзельнікі
пасадзілі “дрэва ІІ Агульнабеларускай сустрэчы моладзі”. Святары ўдзялілі благаслаўленне
беларускім пілігрымам, якія ўжо заўтра едуць у Мадрыд на Сусветныя дні моладзі, каб
прыняць удзел у супольнай малітве з папам Бэнэдыктам XVI. Прыйшоў час развітання,
але і час чакання... наступнай сустрэчы моладзі ў Івянцы!