Mesazhi i Patrikut Tval për myslimanët, në muajin e Ramazanit
Myslimanët filluan me gushtin, muajin e Ramazanit, muajin e tyre të shenjtë, për të
cilin i kanë uruar edhe të krishterët e mbarë botës. Kështu, Patriku latin i Jeruzalemit,
Fuad Tval, së bashku me klerin dhe besimtarët e Tokës Shenjte, në një letër urimi
të publikuar në faqen e internetit të patriarkatit, u shpreh afërsinë myslimanëve
për këtë kohë, që i kushtohet edhe veprave të devotshme, gjesteve të bamirësisë, faljes
e pendesës. Duke kujtuar suren II të Kuranit, ajeti 183, që thotë “O besimtarë! Ju
është urdhëruar agjërimi, ashtu si u ishte urdhëruar atyre para jush, që të mund të
ruheni nga të këqiat”, Patriku përmend edhe ç’thuhet në Shkrimin e Shenjtë për agjërimin:
“Vallë a s’është agjërimi që unë zgjodha: t’i këpusësh verigat e padrejtësisë, t’i
zgjidhësh leqet e zgjedhës, t’i lëshosh të lirë të shtypurit, të copëtosh çdo zgjedhë?”
(Is 58,6-7). Duke iu lutur Zotit ta bekojë agjërimin e myslimanëve, Patriku Tval uron
që politikanët të frymëzohen për të nxitur pajtimin e sinqertë e për të gjetur një
zgjidhje të drejtë për aspiratat e popullit palestinez, i cili dëshiron një shtet
të pavarur. Uron gjithashtu, që paqja të mbretërojë mbi të gjithë popujt e Tokës Shenjte
e të vendeve arabe pranë saj.