Të dashur dëgjues, vera na gjen shpesh në pushime, natyrisht, ata që munden të shkojnë,
por edhe ata që nuk munden, përpiqen ta kalojnë këtë periudhë duke u shplodhur, duke
u argëtuar e duke ndjekur bukuritë e natyrës, apo të aktiviteteve të ndryshme kulturore,
që zhvillohen në këtë sezon. Në audiencën e përgjithshme të së mërkurës, Papa i ftoi
besimtarët të lexojnë Biblën, duke filluar nga librat më artistikë të saj, më të bukur,
por, për të mos e harruar Zotin edhe gjatë verës e për ta shplodhur e ushqyer shpirtin,
do të mjaftonte të shihnim në natyrën që na rrethon e në bukuritë e saj dorën e Hyjit.
Në emisionin e sotëm do të flasim për kuptimin e krishterë të fjalës “bukuri”,
shpesh aq e keqpërdorur nga imazhet televizive e moda, sa t’i ndryshohet krejtësisht
thelbi. 741 herë me radhë, në Besëlidhjen e Vjetër përmendet një fjalë e ngjashme
me puhizën, “tôb”: kuptimi i saj gjendet diku ndërmjet fjalëve “mirë” dhe “bukur”
e kjo na bën të kuptojmë se për Biblën, bukuria e mirësia, estetika dhe etika ndërthuren
në mënyrë të pazgjidhshme. Dy janë shembujt më domethënës, që mund të japim për këtë.
Nga njëra anë, krijimi: në fundin e çdonjërës nga gjashtë ditët, gjatë të cilave Zoti
krijon botën, Shkrimi i Shenjtë vëren: “Hyji pa se ishte ‘tôb’”, pra ishte
gjë e mirë dhe e bukur (Zan 1,4.10.12.18.21.25). Kur Zoti krijon njeriun, Shkrimi
i Shenjtë përdor shkallën sipërore, sepse kjo krijesë është “shumë e bukur/e mirë”
(1,31), maja më e lartë e krijimit. Nga ana tjetër, figura e Krishtit: Ungjilli
i Shën Gjonit e përshkruan me një imazh biblik, atë të bariut. Zakonisht, frazën përkatëse
nga ky Ungjill e përkthejmë kështu: “Unë jam Bariu i Mirë” (Gjn 10,11.14).
Në të vërtetë, në origjinalin grek thuhet: “Unë jam Bariu i Bukur (kalòs)”,
duke e përdorur fjalën ‘i bukur’ në vazhdën e kuptimit të fjalës hebraishte ‘tôb’,
që përmendëm më parë, në të cilën bashkohen bukuria dhe mirësia e Krishtit me shkëlqimin
e Lajmit, që Ai erdhi të na sjellë – diçka që e rrethon me dritë, siç ndodh gjatë
Shndërrimit të Tij, përshkruar nga ungjijtë (Lk 9,29). Në Bibël, bukuria ëshë
një cilësi hyjnore, që pasqyrohet në gjithësi me krejt ndryshueshmërinë e pasurinë
e saj. Jo më kot, në Librin e Urtisë shkruhet se “prej madhërisë dhe bukurisë së
krijesave mund të njihet me krahasim, Krijuesi i tyre”(13,5). Pasqyrimi më i lartë
i bukurisë së Zotit shihet tek njeriu, krijuar “në ngjarshmëri” me Hyjin, siç thekson
Libri i Zanafillës(1,27). Kënga e Këngëve, me përshkrimet e saj delikate e të apasionuara
të trupit të gruas e të burrit, në gjithë hirin e tyre magjepsës(kap. 4;5;7) është
dëshmia më e qartë e kësaj bukurie, nëse kemi parasysh edhe se trupi, në konceptimin
semit të kohës, nuk është thjesht fizik, por edhe shpirtëror, pra përfshin gjithçka
ka të bëjë me njeriun, edhe botën e tij të brendshme. Ky bashkim ndërmjet shpirtit
dhe trupit fizik na tregon se bukuria duhet të ndërthuret me qashtërsinë e ndërgjegjes,
me dritën e shpirtit. Në të kundërt, do të kishim vetëm një përmasë të jashtme të
bukurisë, gjë që vihet mirë në dukje në Librin e Fjalëve të Urta, ku thuhet: “Hijeshia
është e rreme e bukuria është e kotë: gruaja që e dron Zotin, ja, e cila duhet lavdëruar!”
(31,30). Prej këndej, kuptohen edhe gjykimet e rënda të traditës popullore, që
përmenden në këtë Libër: “Rreth i artë në turinjtë e dosës, gruaja e bukur, por
e pamend” (11,22). Bukuria shprehet gjithashtu në vetë tekstet e Shkrimit
të Shenjtë. Vërtet, ato janë një monument i mrekullueshëm letërsie. Kemi faqe të tëra
poetike, me intensitet të jashtëzakonshëm e me bukuri çarmatosëse, si në rastin e
Librit të Jobit, në Këngën e Këngëve, ose në disa Psalme. Në to përshkruhet një pasuri
e tërë me figura e simbole, të cilat kanë frymëzuar artin në shekuj. Pastaj, faqet
biblike bëhen edhe më të çmuara nga tregimet e shembëlltyrat e mahnitshme të Jezusit.
Prandaj, ftesa e Papës për të lexuar Biblën gjatë këtyre pushimeve verore duhet kuptuar
edhe si ftesë për “t’i kënduar Zotit me art” (Ps 47,8), sepse “via pulchritudinis”,
“rruga e bukurisë” së vërtetë është udhë e privilegjuar për të arritur tek Zoti i
bukurisë.