2 жніўня ў Рыміні адбылося пахаванне арцыбіскупа Пьетро Самбі, былога апостальскага
нунцыя ў ЗША. Іерарх памёр у 73-гадовым узросце у амерыканскім Балціморы, 27 ліпеня
2011 г.
Пахавальную св. Імшу ўзначаліў Субстытут Апостальскай Сталіцы арцыбіскуп
Джаванні Анджэла Бэччу. Ад імя Пантыфіка іерарх выказаў спачуванні блізкім памерлага
і ўсёй дыяцэзіі Рыміні, з якой паходзіў арцыбіскуп Самбі. “З гэтай зямлі, дзе ён выхоўваўся
культурна і духоўна, адправіўся несці розным народам як пасланнік Папы, евангельскую
навіну справядлівасці і міра”, - адзначыў у сваёй прамове арцыбіскуп Бэччу. Іерарх
узгадаў, што на працягу жыцця памерламу наканавана было выконваць дыпламатычную місію
у многіх складаных рэгіёнах, асабліва у Святой Зямлі і ЗША. “Ён заўсёды праяўляў сябе
як чалавек глыбокай і моцнай веры, дбайны і адважны пастыр, які ведаў людзей”, -
адзначыў арцыбіскуп Бэччу.
Іерарх расказаў аб тым, што арцыбіскуп Пьетро Самбі
карыстаўся вялікай павагай і аўтарытэтам у Святога Айца. Папа нават планаваў задзейнічаць
яго ў Рымскай Курыі, “аднак Пан пажадаў паклікаць да сябе свайго добрага і вернага
слугу”. Арцыбіскуп Бэччу прачытаў таксама спачувальны ліст Бэнэдыкта XVI, у якім Пантыфік
адзначыў яго “дбайнае святарскае жыццё і шчырае служэнне Апостальскай Сталіцы ў розных
краінах, асабліва ў Святой Зямлі і ЗША, дзе ён мудра рэалізаваў свае інтэлектуальныя
і духоўныя дары”.