Біскупы ЗША пра 11 верасня: прабачаць не азначае бяздзейнічаць
“Прабачэнне”, “мір”
і “прымірэнне” – на гэтыя тры прынцыпы звяртае ўвагу Каталіцкі Касцёл у Амерыцы, напярэдадні
10 гадавіны тэрактаў 11 верасня. Каб узгадаць аб тысячах ахвяр нападу “Аль-Кайды”,
амерыканская біскупская канферэнцыя стварыла спецыяльную інтэрнэт старонку, на якой
змешчаны літургічныя рэкамендацыі і практычныя парады для адзначэння гэтай трагічнай
даты.
“11 верасня. Касцёл памятае” – так называецца старонка, на якой біскупы
звяртаюць увагу на некаторыя аспекты, якія варта падкрэсліць у гаміліях, што прагучаць
у гэты дзень. Увага звяртаецца на важнасць галоўнай тэмы: “выкліку прабачэння”. “Неабходна
даверыць Пану наш гнеў і наша жаданне помсты, таму што гэта задача Бога, а не наша
– караць тых, хто ўчыніў зло. Мы не павінны насіць у сабе жаданне помсты, але абавязаны
прабачаць”, - пішуць амерыканскія іерархі. “Прабачаць іншаму, не азначае пазбавіць
яго адказнасці за ўчыненае, таму што міласэрнасць не выключае справядлівасці і неабходнасці
навяртання, але адкрывае шлях любові, якая іх умацоўвае”, - адзначаюць біскупы.
“Канешне,
лягчэй прабачыць грубасць ці маленькае занядбанне, што здараюцца ў нашым штодзённым
жыцці, чым тое, што адбылося 11 верасня. Але прабачаючы мы становімся здольнымі жыць
у міры і любові, а не ў нянавісці, якая ўсё разбурае. Езус не быў пасіўным у адносінах
да зла. Таму мы павінны працаваць, каб бараніць нявінных і спыніць злачынствы супраць
чалавецтва. Прабачыць не азначае бездзейнічаць”, - адзначаецца ў пасланні.
Акрамя
таго, іерархі заклікаюць да канкрэтных крокаў, якія дапамогуць аднавіць мір: маліцца
за спыненне гвалту, пасціць у інтэнцыі міра і справядлівасці, лепш знаёміцца з навучаннем
Касцёла адносна вайны і міра, практыкаваць міжрэлігійны дыялог, сведчыць аб хрысціянскіх
каштоўнасцях, такіх як: павага да жыцця і годнасць чалавека, дапамагаць і служыць
патрабуючым, быць салідарнымі з тымі, хто пакутуе і прасіць аб Божых ласках”.