Нікарагуа: павялічваецца канфлікт паміж Артэгай і біскупамі
У Нікарагуа пашыраецца
канфлікт паміж каталіцкімі біскупамі краіны і Прэзідэнтам Даніэлем Артэгай у сувязі
з маючымі адбыцца ў лістападзе прэзідэнцкімі выбарамі. “Бог выратуе нас”, - заявіў
на мінулым тыдні Артэга падчас выбарчага мерапрыемства да сваіх прыхільнікаў, маючы
на ўвазе “вызваленне” краіны ад Канферэнцыі Каталіцкіх Біскупаў.
Біскупы лічаць
выстаўленне кандыдатуры Артэгі на выбарах незаконным. Паводле канстытуцыі з 2007 г.,
дзеючы прэзідэнт і сандзініст больш не можа быць кандыдатам на пасаду кіраўніка дзяржавы,
але з дапамогай суда вясной гэтага года ён змусіў парламент зацвердзіць сваю кандыдатуру
на пераабранне.
Старшыня біскупскай канферэнцыі Нікарагуа, арцыбіскуп Леапольда
Брэнэс, паддаў рэзкай крытыцы Цэнтральную выбарчую камісію і Вярхоўны суд. Яны, паводле
арцыбіскупа, як наглядныя органы, пагаджаюцца на бязпраўе. “Калі гэтыя інстытуты прытрымліваліся
б прынцыпаў Канстытуцыі, яны б не зацвердзілі гэту незаконную кандыдатуру”, - сказаў
ён.
19 ліпеня кіруючы левы сандзінісцкі фронт нацыянальнага вызвалення адзначаў
32-ю гадавіну сандзінісцкай рэвалюцыі. У сувязі з гэтым, некаторыя каталіцкія святары
цэлебравалі так званую “Імшу рэвалюцыі”. Біскупская канферэнцыя краіны назвала такі
крок палітызаваннем і абвясціла даследаванне ў гэтай справе.
Біскупаў асабліва
турбуе мова кампаніі Артэгі. Ён назваў рэвалюцыю “Божай справай”, а сандзінісцкі фронт
нацыянальнага вызвалення, паводле яго, дзейнічае "ад імя Пана". “Рэлігійныя элементы
не павінны выкарыстоўвацца ў прапагандысцкіх мэтах”, - сказаў дапаможны біскуп Манагуа
Сільвіо Баэз, які з'яўляецца адным з самых рэзкіх крытыкаў Артэгі.