Gusht 1991: Bari kujton 20 mijë shqiptarët, që erdhën në Itali me anijen “Vlora”
Një javë me art, kulturë, shfaqje e sport në emër të vëllazërimit ndërmjet dy popujve,
atij italian e atij shqiptar. Me një aktivitet, që mban emrin “Misioni Vlora”, Bari
kujton 20-vjetorin e mbërritjes së rreth 20 mijë shqiptarëve, nisur nga Durrësi me
anijen Vlora e mbërritur në Itali më 8 gusht 1991.
Më rënien e komunizmit,
nga Shqipëria iknin vazhdimisht emigrantë me çdo lloj mjeti, sidomos për në Brindizi,
por zbarkimi i shqiptarëve të anijes “Vlora” qe një ngjarje historike e dramatike,
e cila zgjoi polemika të jashtëzakonshme në Itali. Menjëherë pas mbërritjes, 20 mijë
emigrantët u mbyllën në stadiumin e qytetit, nën diellin përvëlues, duke e shkatërruar
atë pothuaj krejtësisht.
Më 5 gusht, do të jetë në Bari, presidenti i Republikës
së Shqipërisë, Bamir Topi, i cili do t’i japë qytetit bregdetar Medaljen e Falenderimit,
për të nënvizuar nivelin e integrimit të shqiptarëve të anijes “Vlora” me banorët
vendas. I pranishëm balerini shqiptar Kledi Kadiu, i cili pati ardhur në Itali pikërisht
me anijen, që zbarkoi në Pulja në verën e 1991-shit, por edhe poeti Visar Zhiti, muzikanti
Zhani Ciku e shkrimtari Lutfi Guri, ish-kampion shqiptar i 100 e 200 metrave, ish-komisar
teknik i kombëtares shqiptare të atletikës. Ndër aktivitetet, që filluan sot e përfundojnë
më 8 gusht, një ekspozitë, lexime poezish, shkëmbime përvojash, shfaqje artistike
e një maratonë 8 km.