Sali Berisha: qarqet ultra nacionaliste serbe, rrezik për paqen e stabilitetin në
rajon
Kryeministri i Shqipërisë Sali Berisha shprehu sot mbështetjen e plotë të qeverisë
shqiptare për të drejtën dhe vendimet e qeverisë së Kosovës për garantimin e rendit
kushtetues, integritetin dhe kontrollin e plotë të territorit të saj. Në një konferencë
për shtyp, Berisha u shpreh se qeveria e Shqipërisë po ndjek me shqetësim provokimet
e rrezikshme të bandave të serbomëdhenjve në kufirin verior të Republikës së Kosovës. "Qeveria
e Shqipërisë dënon aktet kriminale të falangave të serbomëdhenjve në vendkalimet në
kufirin verior të Kosovës, vrasjen e oficerit të forcave speciale të Kosovës, djegien
e ndërtesave të doganave dhe sulmin e djeshëm të armatosur ndaj njësive tokësore dhe
ajrore të KFOR-it në vendngjarje", deklaroi kryeministri. Të gjitha këto, tha Kryeministri
Berisha, janë të mbështetura, të frymëzuara dhe të paguara nga qarqe ultra nacionaliste
të Beogradit dhe dëshmojnë qartë se fantazma e Serbisë së madhe paraqet sërisht rrezik
për paqen dhe stabilitetin në rajon. "Qeveria shqiptare mbështet plotësisht autoritetet
dhe popullin e Kosovës, KFOR-in dhe autoritetet ndërkombëtare në Kosovë, për vendosmërinë
e tyre për garantimin e rendit kushtetues dhe integritetin territorial të Kosovës,
dhe vendosjen nën kontroll të plotë, në përputhje me ligjet dhe kushtetutën e vendit,
të të gjitha vendkalimeve kufitare të kësaj Republike", nënvizoi Kryeministri Berisha. Berisha
shprehu bindjen se çdo përpjekje për dhunimin e integritetit territorial dhe rendit
Kushtetues të Kosovës do të marrë përgjigjen e merituar. Kryeministri i Shqipërisë
vuri në dukje se qeveria shqiptare, ndonëse është për lëvizjen e lirë të mallrave,
ideve dhe njerëzve dhe kundër çdo lloj embargoje, mbështet plotësisht vendimet e qeverisë
së Kosovës, bazuar në parimin e reciprocitetit, për ndalimin e hyrjes së mallrave
serbe në Kosovë, si vendim tërësisht i imponuar nga embargoja disa vjeçare serbe për
mallrat e Kosovës. Ai shprehu vendosmërinë e qeverisë për t'i krijuar Kosovës të gjitha
lehtësirat portuale dhe të tjera për të përballuar embargon e Serbisë ndaj saj, me
pasoja sa më të vogla. "Qeveria e Tiranës i bën thirrje qeverisë së Kosovës dhe
asaj serbe të marrin të gjitha masat për uljen e tensionit dhe krijimin e kushteve
për suksesin e dialogut dhe negociatave në kuadrin e procesit të Brukselit, si procesi
midis palëve të barabarta, tejet i rëndësishëm për vendet e tyre, paqen dhe stabilitetin
në rajon", përfundoi Kryeministri Berisha.