Një komision amerikan shqetësohet për të drejtën e lirisë fetare në Turqi.
Përmes një deklarate, që shkaktoi pakënaqësinë e qeverisë së Ankarasë, një komision
i Kongresit të SHBA-ve kërkoi, të mërkurën e kaluar, nga Turqia, të sigurojë lirinë
fetare në vend e t’ua kthejë pronat kishtare pronarëve të ligjshëm. Pas
një debati të fortë, Komisioni i Ministrisë së Punëve të Jashtme amerikane miratoi
një tekst, përmes të cilit pohon se Turqia duhet t’i japë fund formave të diskriminimit
fetar e t’ua kthejë pronarëve të ligjshëm të gjitha kishat e vendet e tjera të krishtera,
me vlera historike. Pakicat fetare kërcënohen seriozisht në Turqinë e sotme, theksoi
deputeti Ed Rojs, republikan i Kalifornisë. Në vend që të mbrohen nga shteti, pakicave
fetare (ndërmjet të cilave, Patriakana Ekumenike e Kishës greko-ortodokse) edhe kështu
krejt të ligështa, u mohohet deri njohja ligjore e ekzistencës së tyre – tha, në vijim,
deputeti republikan. Në Turqi, më 1971 u mbyll seminari i madh i Kishës ortodokse,
me seli në Stamboll që nga koha e Bizantit, ashtu si, gjithnjë në emër të laicitetit
të shtetit, u bënë përpjekje për ta vënë, dalngadalë, edhe universitetin nën kontrollin
shtetëror. Shteti turk nuk e njeh titullin e Patrikut Ekumenik Bartolomeu I, si
prijës i të krishterëve ortodoksë dhe, detyrohet, ta konsiderojë vetëm si kryebari
i pakicës greko-ortodokse të pranishme në vend. “Turqia e kundërshton amendamentin
e përfshirë në një projekt-ligj, që vëren se vendi është historikisht atdhe i një
numri të madh të krishterësh e hebrenjsh. U kundërvihet, gjithashtu, të gjithë atyre,
që përdorin terma të tilla, sepse e shikon këtë si qëndrim të pjesshëm e të njëanshëm,
i cili errëson të gjitha etapat konstruktive, që ka kryer e po kryen për mbrojtjen
e lirisë fetare e të tolerancës, si edhe për ruajtjen e vendeve të kultit, që u përkasin
hebrenjve e të krishterëve” – shprehet në një komunikatë, ambasadori turk në Uashington,
Namik Tan.