Në Norvegji ridimensionohet bilanci i viktimave të atentatit të dyfishtë të së premtes
së kaluar, kryer nga 32 vjeçari Anders Breivik. Të vrarët janë 76 e jo 93, siç u tha
më parë nga autoritetet e vendit. Ndërkaq, në audiencën e djeshme para gjyqit,
Breivik u deklarua i pafajshëm, pavarësisht se pranoi autorësinë e atentateve, të
nevojshme – sipas tij – për të ndalur të ashtuquajturën “aleancë marksisto-islamike”.
Norvegjezi tha gjithashtu, se ka pasur ndihmën e dy celulave në vend dhe se është
pjesë e një rrjeti, që ka celula edhe në vende të tjera. Autoritetet po përpiqen të
verifikojnë këto deklarata. Avokati i Breivik e konsideron të asistuarin e vet krejtësisht
të marrë dhe ka kërkuar ekspertizë psikike. Në Norvegji vazhdon debati për mundësinë
që Breivik të dënohet vetëm me 21 vjet burg, maksimumi, që parashikon ligji në vendin
me numrin më të vogël të të burgosurve në Evropë. Por sipas gjykatësve, autori i atentateve
të Oslos dhe të Utojës mund të akuzohet për krime kundër njerëzimit. Në atë rast dënimi
rritet deri në 30 vjet burgim.