Ndërroi jetë në Romë kardinali Noe.

Ndërroi jetë, dje, në Romë, kardinali Virgjilio Noe. kryeprift nderi i Bazilikës së Vatikanit, mëkëmbës i përgjithshëm nderi i Papës për Qytetin e Vatikanit, ish-drejtor i Fabrikës së Shën Pjetrit.
Kardinali i ndjerë, i lindur në Zelata të Bereguardos, në dioqezën e Pavisë, më 30 mars 1922, u shugurua meshtar më 1 tetor 1944. Shërbimin meshtarak e nisi në famullinë e të Shëlbuemit, në rrethinat e Pavisë, ku krijoi një lëvizje të fuqishme rinore, përqendruar posaçërisht tek pjesëmarrja në Liturgji. Më 1948, ipeshkvi dioqezan, imzot Karlo Alorio, e nisi në Romë për të ndjekur Universitetin Gregorian ku, më 1952, mori laurën në Histori Kishe, me një tezë kushtuar “Politikës fetare të mbretërve longobardë”. Më 1964 u thirr në Romë për të nisur detyrën e sekretarit të Veprimit Liturgjik.
Një rrugë e gjatë, një jetë plot impenjime, që e çoi në detyrën e Mjeshtrit të Kremtimeve Papnore; atë të zevendës-sekretarit të Kongregatës për Sakramentet e Kultin Hyjnor e të sekretarit të Seksionit për Kultin Hyjnor.
Më 30 janar 1982 u lartua në dinjitetin kryeipeshkvnor, si sekretar i Kongregatës për Sakramentet dhe Kultin Hyjnor - Seksioni i Kultit Hyjnor. Në maj 1989 ishte ndihmës i kardinalit-kryeprift të Bazilikës së Vatikanit, Delegat i Fabrikës së Shën Pjetrit dhe kryetar i Komisionit të përhershëm për mbrojtjen e monumenteve historike e artistike të Selisë së Shenjtë.
Nga 12 shtatori 1993 e deri më 1996 ishte edhe kryetar i Komisionit Kardinalor për Shenjtëroret Papnore të Pompeit, Loretos e Barit.
U krijua kardinal nga Gjon Pali II, në Koncistorin e 28 qershorit të vitit 1991.Me vdekjen e tij, Kolegji Kardinalor përbëhet nga 195 kardinaj, nga të cilët, 144 me të drejtë zgjedhore, 81, me të drejtë këshillimore, domethënë, mbi moshën 80 vjeç.