21 ліпеня 2011 г.,
каля 9 гадзіны раніцы на 97-ым годзе жыцця адышоў у вечнасць кардынал Казімір Свёнтэк.
Сэрца іерарха спынілася ў пінскай бальніцы, дзе ўрачы з 10 сакавіка змагаліся за яго
жыццё. Па словах адказнага за СМІ пры Сакратарыяце Канферэнцыі Каталіцкіх Біскупаў
у Беларусі кс. Юрыя Жэгарына, пахавальныя ўрачыстасці кардынала пройдуць 25 ліпеня
ў пінскай катэдры. Развітанне з памерлым іерархам пройдзе таксама 23 ліпеня ў Мінску.
У
2010 г. кардынал атрымаў траўму шыйкі сцягна, а затым перанёс некалькі хірургічных
аперацый. Стан яго здароўя значна пагоршыўся 10 сакавіка. З таго часу іерарх прабываў
ў рэанімацыйным аддзяленні пінскай бальніцы.
Кардынал Казімір Свёнтэк нарадзіўся
21 кастрычніка 1914 г. у эстонскім горадзе Валга. Пасля заканчэння Вышэйшай духоўнай
семінарыі ў Пінску 8 красавіка 1939 г. ён атрымаў святарскае пасвячэнне і быў скіраваны
на працу ў Пружаны. Падчас камуністычнага пераследу быў арыштаваны і асуджаны на смерць.
Вайна, якая распачалася ў 1941 г., перашкодзіла выканаць прысуд. Аднак у 1944 г. кс.
Свёнтэк зноў быў арыштаваны і асуджаны на 10 гадоў лагераў. Выйшаўшы на волю ў 1954
г., ён стаў працаваць у Пінску.
21 мая 2011 г. споўнілася 20 гадоў біскупскага
служэння кардынала Казіміра Свёнтэка, якое ён пачаў ва ўзросце 77 гадоў. У 1991 г.
Папа Ян Павел ІІ прызначыў яго Мітрапалітам Мінска-Магілёўскім і Апостальскім адміністратарам
Пінскай дыяцэзіі. У 1994 г. іерарх стаў першым беларускім кардыналам з 1798 г.
14
чэрвеня 2006 г. Святы Айцец Бэнэдыкт XVI прыняў прашэнне аб вызваленні ад пастырскага
кіраўніцтва Мінска-Магілёўскай архідыяцэзіяй, якое кардынал Казімір Свёнтэк прадстаўвіў
у адпаведнасці з кан. 401, § 1 Кодэкса Кананічнага Права. 30 чэрвеня 2011 г. Святы
Айцец вызваліў іерарха з пасады Апостальскага Адміністратара Пінскай дыяцэзіі.