Апостальская Сталіца заклікае павялічыць кантроль над гандлем зброяй
20 ліпеня была апублікавана
дэкларацыя Апостальскай Сталіцы аб працы трэцяй сесіі падрыхтоўчага камітэта ААН,
прысвечанай дамове аб гандлі зброяй. Мерапрыемства праходзіла ў Нью-Ёрку 11-15 ліпеня.
У ім прымала удзел дэлегацыя Святога Пасаду пад кіраўніцтвам арцыбіскупа Фрэнсіса
Чуліката, пастаяннага назіральніка Апостальскай Сталіцы ў ААН.
У дэкларацыі,
апублікаванай сёння, паведамляецца, што ў нью-ёрскай сесіі прынялі удзел прадстаўнікі
каля 100 краін свету. Яны прадставілі сваё бачанне праблем, звязаных з гандлем зброяй.
“У многіх частках свету, незаконны гандаль зброяй і боепрыпасамі прывёў да шматлікіх
чалавечых пакут, унутраных канфліктаў, грамадскіх беспарадкаў, парушэнняў правоў чалавека,
гуманітарных крызісаў, злачыннасці, гвалту і тэрору. - гаворыцца ў дакуменце - Гэтыя
праблемы могуць быць эфектыўна вырашаны толькі шляхам агульнага размеркавання абавязкаў
паміж усімі членамі міжнароднай супольнасці”.
“Міжнародная супольнасць
мае патрэбу ў моцных, надзейных, эфектыўных і канкрэтных прававых інструментах, неабходных
для павышэння празрыстасці ў сферы гандлю зброяй, прыняцці агульных крытэрыяў і ўсталяванні
абавязковай юрыдычнай асновы у сферы гандлю і ліцэнзіраванні тэхналогій вытворчасці
зброі і боепрыпасаў”, - гаворыцца ў дэкларацыі Апосталькай Сталіцы.
Святы Пасад
перакананы, што дамова аб гандлі зброяй зможа прынесці важны ўклад у развіццё сапраўднай
глабальнай культуры міру на аснове адказнага супрацоўніцтва паміж дзяржавамі.