Konferencë ndërkombëtare për të krishterët e Tokës Shenjte: nga Londra thirrje e katolikëve
dhe e anglikanëve
Përfundoi sot në Londër, në rezidencën zyrtare të primatit të Bashkësisë Anglikane,
Lambeth Palace, konferenca ndërkombëtare dy ditore mbi të krishterët e Tokës Shenjte.
Takimi zhvillohet në një çast tepër të rëndësishëm, pasi përkrah tensionit për çështjet
e Tokës Shenjte, ekziston një vetëdije në rritje për rëndësinë e paqes së qëndrueshme.
Kryeipeshkvi i Kanterburit, Rouan Uiliams, primat i Bashkësisë Anglikane, organizator
i takimit, uron të krijohet një fond i veçantë për financimin e projekteve në favor
të ekonomisë lokale. Në këtë mënyrë, mund të kontribuohet vërtet në ndalimin e eksodit
të të krishterëve nga trojet ku ka banuar Krishti. Të dëgjojmë vetë kryeipeshkvin
Rouan Uiliams, në mikrofonin tonë: “Do të doja t’u thosha të krishterëve të
Tokës Shenjte se ne e vlerësojmë shumë praninë dhe dëshminë e tyre. Një dëshmi, që
vazhdon në rrjedhën e historisë së krishterë, shpesh në kushte vuajtjesh e tensionesh
të mëdha. Nuk mjafton të shkojmë për të parë vendet e shenjta, duhet të shkojmë të
shohim “gurët e gjallë”, për ta kremtuar dëshminë, që japin të krishterët”. E
të krishterëve të Tokës Shenjte, që kanë nevojë për ndihmë, sidomos në fushën e edukimit
e të arsimit, në mënyrë që të investojnë për të ardhmen, iu drejtua edhe imzot Vinsent
Nikols, kryeipeshkvi katolik i Uestminsterit, me këto fjalë: “Mesazhi që dua
t’u jap të krishterëve të Tokës Shenjte është se i mbështesim shpirtërisht e me lutje.
Falenderojmë Zotin për guximin e fenë tuaj e dëshirojmë ta dini se jeni në zemrat
e në lutjet tona”. Takimi, që u zhvillua dje e sot në Londër, u pasurua me
dëshmitë e të krishterëve të Tokës Shenjte dhe me propozimet praktike për përmirësimin
e jetës së përditshme të bashkësive të krishtera. Mori pjesë edhe Patriku i Jeruzalemit
të Latinëve, imzot Fuad Tval, i cili na shpjegon se çfarë mund të bëhet në këtë çast,
për të krishterët e Tokës Shenjte: "Njerëzit, besimtarët, qytetarët janë të
vetëdijshëm se kjo situatë nuk mund të vazhdojë. Janë politikanët ata, që nuk e kuptojnë
këtë gjithmonë. Besimtarët e të gjitha feve – të krishterë, myslimanë e hebrenj –
duan të kenë një jetë normale e të qetë. Gjatë konferencës folëm dhe i dhamë rëndësi
parësore edukimit: t’i edukojmë të rinjtë të respektojnë njëri-tjetrin, ta njohin
njëri-tjetrin. Kemi shumë institucione: Univeristetin e Betlehemit, Universitetin
e Jordanisë, ku të gjithë mund të takohen e të mësojnë nga njëri-tjetri. Fakti që
në Londër janë ftuar studentë të Betlehemit e të territoreve të pushtuara tregon se
po u jepet rëndësi pikërisht të rinjve. Shpresojmë që Perëndimi, Londra dhe Evropa
të jenë më të vetëdijshëm për gjendjen tonë të vërtetë e që secili, sipas mundësive,
të punojë për më shumë drejtësi e paqe për të gjithë".