Briri i Afrikës. Imzot Bertin: thirrja e Papës kërkon përgjigje të menjëhershme. Në
rrezik, jeta e miliona njerëzve.
Në vise të ndryshme të Afrikës Lindore, 12 milionë njerëz mund të vdesin nga çasti
në çast nga uria. Ndërmjet tyre, më të ligështit janë fëmijët nën moshën pesë vjeçare.
Kisha, në vijën e parë të frontit të luftës kundër urisë, thatësirës e reshjeve vrasëse,
ka vënë në dispozicion, përmes rrjetit të Karitasit, një shumë prej 300 mijë eurosh.
Por, për ta shmangur katastrofën humanitare, bashkësia ndërkombëtare duhet të veprojë
me shpejtësinë e vetëtimës. Thirrja e djeshme e Papës për t’i ndihmuar popullsitë
e Bririt të Afrikës e, posaçërisht, Somalinë e shkretuar nga thatësira, kërkon përgjigje
të përshtatshme e të menjëhershme. Këtë nënvizon, në mikrofonin tonë, administratori
apostolik i Mogadishos e ipeshkvi i Gjibutit, imzot Gjorgjio Bertin. Ta ndjekim
britmën e tij. Ngrihet pikërisht nga zonat e shkretuara të Afrikës, nën rrezet përvëluese
të diellit, që djeg e vret:
Përgjigje: - Jam sigurisht mirënjohës për
këtë thirrje të Papës, edhe pse e inkurajon bashkësinë ndërkombëtare të ndërhyjë.
Nuk është hera e parë që Benedikti XVI bën thirrje për Somalinë. Kujtoj se disa përfaqësues
somalë patën shkruar edhe një letër, duke m’u lutur t’ia dorëzoj Atit të Shenjtë,
për ta falënderuar e për të tërhequr vëmendjen ndërkombëtare mbi problemin somal.
Pyetje:
- Një thirrje, kjo e Papës, që pret përgjigje të menjëhershme. Duhet vepruar shpejt,
sepse situata bëhet gjithnjë më dramatike…
Përgjigje: - Duhet vepruar
shpejt; duhet të nisen paratë, të sigurohen ushqimet, të transportohen çadrat. Duhet
ca kohë për këtë, e nësa koha kalon, fëmijët, sidomos ata nën moshën pesë vjeç, nuk
do të mund të presin. Do të vdesin!
Pyetje: - OKB-ja flet për thatësirën
më të tmerrshme, që është parë në këto 60-vjetët e fundit….
Përgjigje: -
Në rastin e Somalisë, thatësira është kaq shkatërrimtare, edhe sepse vendi, gjatë
20 vjetëve të fundit, jeton në një situatë pasigurie, konflikti, mungese të plotë
të shtetit. Ndërkohë, disa organizata humanitare u detyruan të largohen, për shkak
të këtyre kushteve, krejtësisht të papërshtatshme. Disa të tjera, u dëbuan, të akuzuara
se ndihmojnë jo për të bërë mirë, por keq. Mendoj se pasiguria dhe përpjekjet për
të rindërtuar shtetin, në këtë çast, nuk duhen lënë mënjanë, për të siguruar ndihmën
humanitare. Shteti e ndihma duhet të shkojnë krah për krah. Duhet rindërtuar sa më
shpejt shteti. E edhe një shoqëri civile, që të funksionojë.
Pyetje: -
Pra ju mendoni se duhet një korridor humanitar, një ndihmë konkrete për këtë popullsi,
paralelisht me krijimin e një rrjeti politik e shoqëror, që nis të funksionojë. Në
sa tani për tani mungon fare…
Përgjigje: - Për fat të keq, mungon, e
atëhere mbetet vetëm një mundësi e vogël; ajo tradicionale, roli i pleqve të fisit
që, e përsëris, për fat të keq, vitet e fundit është zbehur shumë. Prandaj, edhe për
këtë arsye, korridori humanitar duhet studiuar me kujdes të madh, sepse nuk mund të
vihet lehtë në praktikë. Është e qartë se mbetet vetëm zona e Mogadishos, ku porti
dhe aeroporti, si dhe disa struktura të tjera, janë nën kontrollin e qeverisë federale
të tranzicionit, e cila, duhet thënë, nuk është se qeveris shumë. Por, të paktën,
në këtë zonë të Mogadishos, ndihmat humanitare mund të lëvizin. Pastaj duhet parë
si mund të shpërndahen, duke pasur mirë parasysh se popullsia, e etur dhe e uritur,
po lëviz në tre drejtime kryesore: drejt kufirit me Kenian, me Etiopinë dhe drejt
Mogadishos. Shpresojmë se nuk do të arrihet në tragjedinë e 1992-it, kur, si pasojë
e urisë dhe e çrregullimeve, vdiqën shumë njerëz, ndoshta rreth gjysëm milioni. Shpresoj
shumë se bashkësia ndërkombëtare, këtë herë, do të jetë më e shpejtë, duke i njohur
mirë edhe vështirësitë, që duhen përballuar, për të arritur, së paku, tek somalët,
të cilët vijojnë të jetojnë në Somali.