அனைத்துலக நெல்சன் மண்டேலா தினம் – 67 நிமிட நடவடிக்கை

ஜூலை 16,2011. நெல்சன் மண்டேலா மனித சமுதாயத்திற்கு 67 வருடங்கள் சேவை செய்ததைக் கவுரவிக்கும் விதமாக ஒவ்வொருவரும் தங்களது நேரத்தில் 67 நிமிடங்களைப் பொதுநலச் சேவைக்காகச் செலவழிக்குமாறு கேட்டுள்ளார் ஐ.நா.பொதுச்செயலர் பான் கி மூன்.
அனைத்துலக நெல்சன் மண்டேலா தினம் ஜூலை 18ம் தேதி கடைபிடிக்கப்படுவதையொட்டி செய்தி வெளியிட்ட பான் கி மூன் இவ்வாறு கேட்டுக் கொண்டார்.
பிறருக்குச் சேவை செய்யுங்கள், நல்மாற்றத்திற்குத் தூண்டுதலாக இருங்கள் என்றும் வலியுறுத்தியுள்ள பான் கி மூன், நம்மால் உலகை மாற்ற முடியும், அதனை நல்லதோர் உலகாக அமைப்பது நம் கையில் இருக்கின்றது என்றும் கூறியுள்ளார்.
இரண்டாவது அனைத்துலக நெல்சன் மண்டேலா தினமாகிய இவ்வாண்டு ஜூலை 18ம் தேதி நெல்சன் மண்டேலா தனது 93வது பிறந்த நாளைக் கொண்டாடுகிறார். தென்னாப்ரிக்காவில் நிறவெறியை எதிர்த்ததால் 27 ஆண்டுகள் சிறையில் இருந்தவர் மண்டேலா.