Papa është shumë i shqetësuar për emergjencën në Somali. Cor Unum dërgon ndihmën e
parë.
Këshilli Papnor “Cor Unum”, duke shprehur shqetësimin dhe solidaritetin e Papës, që
vijon ta ndjekë nga afër situatën e rëndë të Somalisë, vendosi të dërgojë, në emër
të Atit të Shenjtë, ndihmën e parë, prej 50 mijë eurosh. Shuma iu besua administratorit
apostolik, ipeshkvit të Gjibutit, imzot Gjorgjo Bertin. Lajmi u njoftua nga i njëjti
dikaster i Vatikanit i cili, pikërisht sot, kremtoi 40-vjetorin e themelimit. Kujtojmë
se u themelua me dëshirën e Papës Pali VI.
Uri e etje, dy kërkesa jetike për
njeriun. Që shumëkush i plotëson pa kurrfarë mundimi e pa i shkuar as nëpër mend se
duhet të jetë i lumtur, vetëm pse nuk ka uri, as etje. Ashtu si kanë somalezët, që
i drejtojnë botës një thirrje pa përgjigje, për ndihmë. Prej trevash, kthyer në shkretëtirën
më të keqe, që mund të mendohet, në tokë të plasaritur nga thatësira e të përvëluar
nga dielli. Vulë e tragjedisë së një populli, që po vdes buzë ujit, i papirë e pranë
sofrës, i pangrënë. I gjithë Briri i Afrikës është tejet i ligështuar. Dhjetë-njëmbëdhjetë
milionë njerëz – aq sa banorët e Portugalisë – vuajnë nga thatësira e pamëshirshme,
që vret njerëz e mbyt kafshë, që i than deri në rrënjë të mbjellat, në një zonë, e
cila vijon të zgjerohet, duke përfshirë edhe Etiopinë e Kenien, ku, në veri, nuk
bie shi që prej një viti. Drama nuk është e re. Përsëritet prej kohe. E Benedikti
XVI, që e ka shumë për zemër Afrikën, vijon ta kujtojë vazhdimisht Somalinë e gjunjëzuar
nga etja e uria. Gjashtë muaj pas zgjedhjes së tij në fronin e Shën Pjetrit, duke
iu drejtuar ipeshkvijve të Etiopisë dhe të Eritresë, së pari kujtoi pikërisht këta
njerëz të martirizuar: “Ju inkurajoj t’u shprehni solidaritetin në të gjitha
mënyrat e mundshme, vëllezërve e motrave tuaja të vuajtura në Somali, ku mungesa
stabilitetit politik e bën pothuasje të pamundur jetën e njeriut”(Audienca
me ipeshkvijtë e Etiopisë e të Eritresë, 17 tetor 2005). Më 2007, kryeqyteti
i Somalisë, Mogadisho, ishte fushë beteje. Luftohej shtëpi më shtëpi, një luftë e
brendshme pa pikë mëshire, vetëm e vetëm për epërsi politike. Pasojat qenë grumbujt
e të vdekurve pa varr, që qelbeshin nën diellin përvëlues, rrugëve të kryeqytetit.
Ndërmjet marsit e prillit, nga lufta, u kalua në kaos. Dhjetra mijëra civilë morën
arratinë e vdiqën, gjatë ushtrimit të një dhune mizore, e cila solli katastrofën
humanitare, që vijoi muaj e muaj e që Benedikti XVI e njeh mirë: “Ndjek
me shqetësim të thellë zhvillimet e ngjarjeve e u bëj thirrje të gjithë atyre, që
kanë përgjegjësi politike, në nivel lokal e ndërkombëtar, të gjejnë sa më shpejt rrugëzgjidhje
paqësore e t’i lehtësojnë vuajtjet e këtyre popullsive të dashura. U jap zemër edhe
të gjithë atyre, që në këtë situatë pasigurie e shkretimi, kanë guximin të mbeten
në vend, për t’i ndihmuar, me se munden, banorët në mjerim”(Audienca e
përgjithshme, 21 nëntor 2007). Në një botë, ku ndërvartësia e shteteve na mësoi,
ndonëse jo aq shpejt, ta globalizojmë edhe konceptin e solidaritetit, Kisha duket
gjithnjë në skenë e, nganjëherë, koordinon, me strukturat e Karitasit, veprimtarinë
e ndihmës, në rastet e emergjencave. Në mënyrë të veçantë Papa, falë largpamësisë
së Palit VI, që e themeloi, më 15 korrik 1971 – ka në dispozicion dikasterin “Cor
Unum” – “Një zemër e vetme” - për të arritur sa më shpejt në epiqendër të mjerimit,
si shenjë e afërsisë së menjëhershme, në përpjekjen për të shëruar plagë, që s’presin.
Është shenjë e dukshme e dashurisë për njeriun, pasqyrim i dashurisë hyjnore, që synon
ta përmirësojë, edhe praktikisht, jetën njerëzore: “Veprimtaria për
të përmirësuar, lidhet drejtpëdrejt me jetën e misionin e këtij dikasteri, sepse shpëtimi
i Krishtit është i gjithanshëm; e përfshin njeriun në të gjitha përmasat: fizike e
shpirtërore, shoqërore e kulturore, tokësore e qiellore. Pikërisht nga kjo vetëdije
lindën, në rrjedhë shekujsh, shumë vepra e struktura kishtare, me synimin për të përmirësuar
jetën e njerëzve e të popujve, që dhanë e vijojnë të japin një kontribut të pazëvendësueshëm
për rritjen e zhvillimin e harmonishëm e të gjithanshëm të njeriut”. Këto
fjalë të Papës janë shumë domethënëse, sepse iu drejtuan, një vit më parë, pikërisht
anëtarëve të Cor Unum. Të bashkëpunosh për ndërtimin e një rendi të drejtë në shoqëri,
ripohoi me këtë rast Papa, bën pjesë në dëshmimin e dashurisë së Krishtit për njeriun: “Kisha,
me kumtimin e Ungjillit, hap zemrën për Zotin e për të afërmin e zgjon, kështu, ndërgjegjet,
me forcën e kumtimit të saj, mbron të drejtat e vërteta të njeriut dhe impenjohet
për drejtësinë. Feja është forcë shpirtërore, që pastron arsyen në kërkim të një rendi
të drejtë, duke e çliruar nga rreziku, gjithnjë i pranishëm, i verbimit nga egoizmi,
nga interesat vetjake e nga etja për pushtet” (Audienca me Këshillin Papnor
Cor Unum, 13 nëntor 2009).