Papa do të presë kryeministrin malezian. Një hap para drejt vendosjes së marrëdhënieve
diplomatike ndërmjet dy shteteve.
Gjatë periudhës së pushimeve në Kastel Gandolfo, është parashikuar një takim i Benediktit
XVI me kryeministrin e Malezisë, Naxhib Razak. Pas kërkesës nga ana e autoriteteve
të Malezisë, Papa u tregua i gatshëm për të biseduar me përfaqësuesin e vendit aziatik.
Njoftimin e jep atë Federiko Lombardi, drejtor i Sallës së Shtypit të Vatikanit. Takimi
është me rëndësi të veçantë, duke pasur parasysh se shumica e banorëve të vendit të
madh të lindjes së largët, është myslimane, por në gjirin e saj jeton edhe një pakicë
katolikësh, që japin një kontribut tejet të rëndësishëm. Të krishterët përbëjnë 8%
të popullsisë, katolikët, 3%. Malezia nuk ka marrëdhënie diplomatike me Vatikanin
e, sipas burimeve qeveritare të Kuala Lumpur-it, audienca e 18 korrikut të ardhshëm
është një hap i rëndësishëm përpara në rrugën e lidhjeve të mundshme të drejtpërdrejta
ndërmjet dy shteteve. Shtypi malezian e shikon si tepër të rëndësishëm takimin e kryeministrit
të vendit, me Benediktin XVI, të cilin gazetat e maleziane e cilësojnë si liderin
më të rëndësishëm të krishterë. Është takimi i dytë i një kryeminstri të Malezisë
me një papë. I pari është ai i kryeministrit malezian Tun dr Mahathir Mohamad me
Gjon Palin II, në vitin 2002. Në shtypin malezian pasqyrohet fuqimisht dëshira
për ta bindur opinionin se Malezia është komb, ku sundon Islami i moderuar, ashtu
siç është i moderuar edhe qëndrimi i kryeministrit, sidomos kur është fjala për respektimin
e të drejtave të pakicave fetare ose etnike, që bashkëjetojnë në këtë vend. Pikërisht
këto ditë edhe në Malezi kanë nisur manifestime të mëdha proteste, ashtu si në mbarë
botën arabe. Ndërmjet tjerash demonstruesit kërkojnë reforma në fushën elektorale
e kushtetuese.