Հայաստանի Հանրապետութեան սփիւռքի նախարարութեան եւ Երեւանի պետական համալսարանի լրագրութեան
բաժանմունքին կազմակերպութեամբ 11-րդ օրն ըլլալով սփիւռքի զանգուածային լրատուամիջոցներու
երիտասարդ լրագրողներու դպրոցը կը շարունակէ իր աշխատանքները: Այս ծրագիրին իրենց մասնակցութիւնը
կը բերեն 18 լրագրողներ 11 երկիրներէ` Հնդկաստան, Էսթոնիա, Լոնտոն, Հոլանտա, Իրան, Եգիպտոս,
Սուրիա, Ռուսիա, Վրաստան, Աբխազիա եւ Լիբանան: «Ազդակ»ի աշխատակազմէն այս դպրոցին կը
հետեւի երիտասարդ լրագրող Արազ Գոճայեան, որ կը տեղեկացնէ որ ՝՝Երեւանի պետական համալսարանի
լրագրողներու բաժանմունքի շէնքին մէջ տեղի ունեցող դասախօսութիւններուն շարքին, 7 յուլիսին
աւելցան երեք նոր դասախօսութիւններ՝՝ : «Արմենփրես» լրատու գործակալութեան խմբագիր
Հրայր Զօրեան հակիրճ ձեւով ներկայացուց Հայաստանի լրատուամիջոցներուն իրավիճակը Խորհրդային
Միութեան շրջանին եւ այսօր, երբ Հայաստանը անկախ է: Ապա ան խօսեցաւ լրագրական ասպարէզի
կարեւորութեան եւ լրագրողներու պատասխանատու կեցուածքի տէր ըլլալու անհրաժեշտութեան մասին: Ապա
ուղղակի կապ հաստատուեցաւ Պէյրութ` համացանցային «Սքայփ» դրութեան միջոցով, եւ «Ազդակ»ի
տնօրէն եւ գլխաւոր խմբագիր Շահան Գանտահարեան լուսարձակի տակ առաւ տպագիր ու ելեկտրոնային
մամուլի կարեւորութիւնը: Ան յատուկ կերպով խօսեցաւ Հայ դատի պայքարին մէջ մամուլին ունեցած
ուրոյն դերակատարութեան ու կարեւորութեան մասին` դիտել տալով, որ պէտք է նաեւ ունենանք
թրքատառ մամուլ, որպէսզի հասանելի ըլլանք թուրք հանրութեան եւս եւ Հայոց ցեղասպանութեան
ու Արցախի հարցերուն վերաբերեալ քարոզչութիւն կատարուի, եւ ճշմարտութիւնները թափանցուին
թրքական իրականութեան մէջ: Մշակութաբան եւ Լրագրութեան բաժանմունքի դասախօս Հրաչ Բայադեան
ներկայացուց «Համաշխարհայնացման տեղեկատուութիւնը» նիւթով դասախօսութիւն մը, որուն ընթացքին
խօսեցաւ այս մարզի արհեստագիտութեան մասին` լուսարձակի տակ առնելով արդիական միջոցները
դրական կերպով ծառայեցնելու անհրաժեշտութիւնը: Այնուհետեւ լրագրողները հանդիպում ունեցան
Երեւանի պետական համալսարանի նախագահ Արամ Սիմոնեանի հետ, որուն հետ փոխանակեցին այս
ծրագիրին վերաբերեալ կարծիքներ ու տպաւորութիւններ: Նշենք, որ լրագրողները ծրագիրի
աւարտին` 15 յուլիսին պիտի ներկայացնեն իրենց աւարտաճառերը, որոնք իբրեւ ուսումնասիրութեան
աղբիւր պիտի օգտագործուին Երեւանի պետական համալսարանի լրագրութեան բաժանմունքին մէջ։