Дэкларацыя кс. Ламбардзі з нагоды незалежнасці Паўднёвага Судана
9 ліпеня адбудзецца
ўрачыстае абвяшчэнне незалежнасці Паўднёвага Судана. З гэтай нагоды кс. Фэдэрыко Ламбардзі,
кіраўнік Залі Друку Апостальскай Сталіцы выдаў спецыяльную дэкларацыю прысвечаную
гэтай падзеі.
У ёй адзначаецца, што Святы Айцец скіраваў у Паўднёвы Судан афіцыйную
дэлегацыю пад кіраўніцтвам кардынала Джона Нжуя, арцыбіскупа Найробі і старшыні Канферэнцыі
Каталіцкіх Біскупаў Кеніі, каб пераказаць уладам новай дзяржавы і ўсім яе грамадзянам,
большасцю з якіх з’яўляюцца католікі, пажаданні міра і росквіту.
“Як адзначыў
арцыбіскуп Дамінік Мамбэрці, сакратар па адносінам з дзяржавамі, падчас сустрэчы з
парламенскай дэлегацыяй Судана, супакой, прымірэнне і павага да правоў усіх, асабліва
права на свабоду веравызнання, з’яўляюцца фундаментальнымі слупамі на якіх будуецца
новае сацыяльна-палітычнае жыццё рэгіёна і ўмовы неабходныя, каб глядзець у будучыню
з упэўненасцю”, - адзначае кіраўнік Залі Друку Апостальскай Сталіцы.
Кс. Ламбардзі
звяртае ўвагу на тое, што “Апостальская Сталіца, якая падтрымлівае дыпламатычныя адносіны
з уладамі Хартума з 1972 г. з належнай увагай разгледзіць аналагічную прапанову ўрада
Паўднёвага Судана і запрашае міжнародную супольнасць падтрымаць гэтую маладую незалежную
дзяржаву, каб праз мірны, сардэчны і канструктыўны дыялог знайсці справядлівыя рашэнні
невырашаных да гэтага часу пытанняў, а таксама жадае гэтаму народу шляху міра, свабоды
і развіцця”