Նախագահ Սարգսեանի Շնորհաւորական Ուղերձը Հայ Ժողովուրդին՝ Սահմանադրութեան Օրուայ
Առթիւ։
Հայաստան երէկ,5 Յուլիսին նշեց Սահմանադրութեան Օրը: Այս առիթով նախագահ Սերժ Սարգսեան
հայ ժողովուրդին յղեց շնորհաւորական ուղերձ մը, յորում Նախագահը կ՝ըսէ. «Սիրելի՛
հայրենակիցներ, Շնորհաւորում եմ ձեզ Սահմանադրութեան Օրուայ կապակցութեամբ: Սահմանադրութեան
ընդունման եւ դրանում փոփոխութիւնների կատարման հանրաքուէները յստակ ցոյց տուեցին Հայաստանի
ժողովրդի դիրքորոշումը, թէ ինչպիսի՛ երկրում է ինքն ուզում ապրել: Սա անվիճարկելի ընտրութիւն
է, որի նկատմամբ յարգանքն ու հաւատարմութիւնը բոլորիս սուրբ պարտականութիւնն է: Սահմանադրութեան
մէջ արտացոլուած է ընկերային, իրաւական ու ժողովրդավարական պետութիւն կերտելու մեր նպատակադրումը:
Այն կեանքի կոչելու ուղղութեամբ մեծ գործ է արուել, բայց պէտք է խոստովանենք, որ շատ
բան դեռ լիարժէք իրականութիւն չի դարձել: Այսօր մենք մեր քայլերով, մեր հետեւողականութեամբ
պէտք է կարողանանք նոր թափով խթանել երկրի հետագայ ժողովրդավարացումը: Մեր քաղաքացիների`
սահմանադրութեամբ ամրագրուած իրաւունքներն ու ազատութիւնները պիտի մտնեն իւրաքանչիւր
տուն եւ հիմնարկ, իւրաքանչիւր գիւղ ու քաղաք, պիտի դառնան ոչ միայն սահմանադրութեան,
այլեւ կեանքի կանոն: Մենք դա կարող ենք անել, քանի որ դրա համար կան ե՛ւ իշխանութիւնների
քաղաքական կամքը, ե՛ւ ժողովրդի լայն հատուածի անկեղծ մղումը: Սիրելի՛ հայրենակիցներ, Կրկին
շնորհաւորելով տօնի առթիւ` մաղթում եմ բոլորիս, որ հնարաւորութիւն ունենանք լիարժէքօրէն
վայելելու մարդու իրաւունքների եւ ազատութիւնների այն լայն դաշտը, որն ինքներս ենք նախանշել
մեր իսկ ընտրութեամբ»: