Papa: vizitë në selinë e gazetës l’Osservatore Romano, me rastin e 150 e themelimit
Benedikti XVI mbështet e miraton veprimtarinë e gazetës së përditshme të Vatikanit,
l’Osservatore Romano” e cila ndër qëllimet e saj ka edhe “vështrimin e problemeve
shoqërore” duke sjell fakte e aspekte “negative”, por ajo ofron edhe një pasqyrë të
shkëlqyeshme e të plotë të shtypit botëror”, nënvizoi Papa, sepse “lexuesve u mundëson
të informohen edhe me shumë lajme pozitive e inkurajuese që nuk mungojnë në botën
tonë, lajme që shpesh herë nuk gjejnë hapësirën e duhur në gazetari e në media”. Kështu
tha Papa Ratcinger gjatë vizitës së sotme në selinë e gazetës së Selisë së Shenjtë
L’Osservatore Romano, me rastin e 150 vjetorit të saj, që u shënua më datën 1 korrik. Benedikti
XVI e quajti të “çmueshme e cilësore” punën e përditshme që zhvillon e përditshmja
vatikanase, e shpjegoi se deshi të shkonte për të vizituar gazetarët e kësaj përditshme,
siç theksoi “në mesin tuaj, për ti shpreh mirënjohjen time të gjithë atyre që konkretisht
e ‘bëjnë’, e krijojnë gazetën me përkushtim njerëzor e të krishterë dhe me profesionalizëm”. Benedikti
XVI vlerësoi funksionin e Osservatore Romano-s që i ndihmon “besimtarët ti konsiderojnë
problemet e momentit në dritën e fjalës së Krishtit e të Magjisterit të Kishës dhe
më vështrimin e vazhdueshëm të shenjave të kohës”. Në këtë perspektivë – vijoi Ati
i Shenjtë – e përditshmja e Selisë së Shenjtë “paraqitet si burim i çmueshëm, që kërkon
të njihet e të vlerësohet përherë e më shumë”. Së fundit Papa inkurajoi të punohet
“me gëzim në ‘aeropagun’ e madh të komunikimeve moderne, duke vlerësuar historinë
e gjatë kësaj gazete të shquar”; e tha se “rrënjët e forta” na ndihmojnë të “shikojmë
me shpresë në të ardhmen”, e ndihmojnë edhe në “formimin e përshtatshëm teknik e profesional”.