Վրաստանի Խորհրդարանը Հայ Առաքելական Եկեղեցւոյ Կը Շնորհէ ՝՝Իրաւաբանական Անձի Կարգավիճակ՝՝
։
Վրաստանի խորհրդարանը անցեալ շաբաթ (2 Յուլիս) առաջին ընթերցումով փոփոխութիւններ մտցուցած
է Վրաստանի քաղաքացիական օրէնսգիրքին մէջ: Այդ փոփոխութիւններուն համաձայն, Վրաստանի
մէջ կրօնական հինգ միութիւններու կը շնորհուի իրաւաբանական անձի կարգավիճակ: Այս մասին
կը յայտնէ «Նովոսթի Կրուզիա» գործակալութիւնը: Երեսփոխանները համապատասխան փոփոխութիւններուն
կողմ քուէարկած են խորհրդարանի արտահերթ նիստին ժամանակ: Մասնաւորապէս, իրաւաբանական
անձի կարգավիճակ կը շնորհուի Հայ Առաքելական Եկեղեցիին, Կաթողիկէ Եկեղեցիին, Իսլամական
Համայնքին, Հրէական Համայնքին եւ Մկրտչական Եկեղեցիին: Օրինագիծին դէմ քուէարկած են
ընդդիմադիր Քրիստոնեայ-Ժողովրդավարական» խմբակցութեան անդամները: «Վրացական եկեղեցին
համանման կարգավիճակ չունի…. Մենք պէտք է հասկնանք` արդեօք Ազրպէյճանն ու Հայաստանը կը
պատրաստուի՞ն նման կարգավիճակ շնորհելու վրացական եկեղեցիին…», հարց տուած է ընդդիմադիր
խմբակցութեան անդամ Նիքոլազ Լալիաշվիլի: