Kosova e Mali i Zi nënshkruan tri marrëveshje bashkëpunimi
Ministri i Punëve të Jashtme i Kosovës, Enver Hoxhaj, gjatë vizitës në Mal të Zi ka
nënshkruar tri marrëveshje ndërshtetërore bashkëpunimi me Ministrin e Punëve të Jashtme
dhe të Integrimeve Evropiane të Malit të Zi, Milan Roqen. Ministri Hoxhaj e Ministri
Roqen nënshkruan Marrëveshjen për ripranimin (Kthimin e Pranimin) e personave që janë
pa leje qëndrimi, Marrëveshjen për regjistrimin e mëvonshëm të personave të zhvendosur
nga Kosova me qëndrim në Mal të Zi, në regjistrat themeltarë dhe në regjistrin e shtetasve
të Kosovës si dhe Marrëveshjen për ripranimin e personave, hyrja dhe qëndrimi i të
cilëve është joligjor. Nënshkrimi i këtyre marrëveshjeve konsiderohet si një hap drejt
përmbushjes së kritereve integruese evropiane dhe tregues i faktit se dy shtetet tashmë
janë të gatshme për përmbylljen e procedurave integruese në Bashkimin Evropian. Sot,
Ministri i Jashtëm i Kosovës, Enver Hoxhaj, udhëtoi në Lituani, ku do t'i bashkëngjitet
Presidentes së Kosovës, Atifete Jahjaga, e cila gjendet në një vizitë zyrtare në këtë
shtet. Ministri Hoxhaj, gjatë qëndrimit në Lituani, do të zhvilloj takime me ministra
të Punëve të Jashtme të Evropës dhe shteteve që ende nuk e kanë njohur pavarësinë
e Kosovës.