Benedikti XVI kremton 60-vjetorin e meshtarisë, në Meshën për festën e Shën Pjetrit
e Palit: falënderon Zotin, që e thirri për t’i shërbyer.
Në një atmosferë lutjesh e gëzimi, Benedikti XVI kremtoi 60-vjetorin e meshtarisë.
Në Solemnitetin e Shenjtorëve Apostuj, Pjetër e Pal, pajtorë të Qytetit të Amshuar,
Papa kryesoi, sot paradite, Meshën Shenjte, në Bazilikën e Vatikanit, kushtuar pikërisht
Princit-peshkatar të Apostujve. Gjatë kremtimit, u vuri mbi supe 41 ipeshkvijve metropolitë,
të thirrur sivjet për detyrën e lartë, Palion, simbol i dinjitetit ipeshkvnor e shenjë
bashkimi me Selinë e Shën Pjetrit. Në kremtimin eukaristik ishte i pranishëm, si zakonisht,
një delegacion i Patriarkanës Ekumenike. Sivjet Patriku i Kostandinopojës dërgoi
në Romë Fortlumturinë e Tij, Emanuel, Metropolit i Francës dhe drejtor i Zyrës së
Kishës Ortodokse pranë Bashkimit Evropian; peshkopin e Sinopit, Atenagoras, ndihmës
i Metropolitit të Belgjikës dhe Arkimandritin Maksimos Pothos, mëkëmbës i përgjithshëm
i Metropolitit të Zvicrës.
“Nuk ju quaj më shërbëtorë, por miq”. 60-vjet
pas shugurimit tim meshtarak, më tingëllojnë ende, me forcë, në shpirt, këto fjalë
të Jezusit...”. Këtë hollësi prekëse të çastit më të rëndësishëm të jetës
së tij, kujtoi sot Papa në homelinë e Meshës. E më pas, fjalët e shqiptuara më 29
qershor, pikërisht 60-vjet më parë, në elterin e katedrales së Frizingës, nga kardinalit
Faulhaber, në festën e Shenjtorëve Pjetër e Pal. Fjalë të skalitura përgjithmonë në
mendje e në zemër: “Nuk jeni më shërbëtorë, por miq: e dija dhe e ndjeja,
në atë çast, se kjo nuk ishte thjesht fjalë “ceremoniale”, citim nga Shkrimi i Shenjtë”.
Ajo, që po ndodhte atë çast, ishte diçka më tepër - vërejti Papa. Mendoja
me vete: “Ai po më thërret mik. Po më pranon në rrethin e atyre, të
cilëve u pati folur në Çenakull”. Në rrethin e atyre, që Ai i njeh më mirë
se të tjerët, në një mënyrë krejt të veçantë: “Po më jep pushtetin, që gati-gati
të tremb, për të thënë e për të bërë atë, që vetëm Ai, Biri i Zotit, mund ta thotë
e mund ta bëjë ligjërisht: “Unë po t’i fal mëkate tuaja!”. Zoti më beson
– mendova atë ças – vijoi fillin e kujtimeve Ati i Shenjtë: “Nuk
jeni më shërbëtorë, por miq: ky është një pohim që të ngjall në shpirt një gëzim të
papërshkrueshëm por që, në madhështinë e vet të pacak, mund edhe të të rrënqethë,
e jo vetëm në atë ças, por për vite e vite, në të gjithë përvojën e ligështisë sate
e të mirësisë së tij të pashterrshme”. Në miqësinë me Jezusin përmblidhet
gjithë programi i jetës meshtarake. Por, ç’do të thotë miqësi? E, sidomos, miqësi
e vërtetë? – pyeti Benedikti XVI: “Miqësi do të thotë të të bashkojnë të
njëjtat mendime, të njëjtat dëshira”. Por, përveç këtij përkimi në mendime
e në vullnet – shtoi Papa – Zoti na kujton një element të tretë, të ri: “Ai
jep jetën e vet për ne! O Zot, më ndihmo të të njoh gjithnjë më mirë! Më ndihmo të
jem një gjë e vetme me vullnetin tënd! Më ndihmo ta jetoj jetën time jo për vetvete,
por së bashku me Ty, për të tjerët. Më ndihmo të bëhem gjithnjë më shumë Miku yt i
ngushtë”. E detyra e parë, që i cakton Krishti dishepujve, miqve – kujtoi
Ati i Shenjtë – është të vihen për udhë, të dalin nga vetvetja e të shkojnë tek të
tjerët: “Duam ta ndjekim Zotin, që vihet për udhë, duke i dhënë fund
përtacisë, që na shtyn të kënaqemi me vetveten, në mënyrë Ai vetë të mund të hyjë
në botë”. Por Jezusi kërkon nga ne edhe të sjellim fryte, fryte që mbeten
- theksoi Ati i Shenjtë - duke kujtuar simbolin e rrushit, frytit të hardhisë, nga
i cili bëhet vera: “Që rrushi të piqet mirë, duhet diell, por edhe shi, ditë
e natë. Që të nxirret verë e cilësisë së lartë, rrushi do shtrydhur, do shtypur, do
pritur të bëhet musht e pastaj, të fermentohet e të bëhet verë, me të njëjtën duresë
e me të njëjtin kujdes, që kërkojnë të gjitha procet e pjekurisë”. A
s’ndodh kështu – pyeti Papa – me jetën e çdo njeriu e, në mënyrë krejt të veçantë,
me jetën e meshtarëve? “Duke kthyer vështrimin pas, mund ta falënderojmë
Zotin për të dyja gjërat: për të vështirat e për të mirat, për orët e zeza e për
orët e bardha. Në të dyja rastet ne shohim praninë e vazhdueshme të dashurisë së Tij,
që na mban mbi shpatulla e na duron vazhdimisht”. Më pas Papa kujtoi solemnitetin
e sotëm të Shenjtorëve Apostuj Pjetër e Pal, në sa fjala e tij ndiqej nga autoritetet
kishtare e civile, ambasadorët, rregulltarët e besimtarët, që ishin mbledhur me shumicë
në Bazilikën e Shën Pjetrit. Ndërmjet tyre, delegacioni nga Kostandinopoja, që solli
në kremtim përshëndetjen edhe urimin e Bartolomeut I, Patrik Ortodoks Ekumenik. E,
para se të vendoste Paliot - kujtojmë, një stolë e bardhë, e qindisur me kryqe të
vogla, simbol i grigjës së Krishtit - Benedikti XVI iu drejtua kryeipeshkvijve të
rinj, duke nënvizuar edhe një herë se Paliot, që i bekon në festën e Shën Anjezes,
na kujtojnë zgjedhën e ëmbël të Krishtit, që duhet ta mbajmë mbi supe: “Është
zgjedha e miqësisë, e prandaj ‘zgjedhë e ëmbël”, por pikërisht për këtë, edhe zgjedhë,
që kërkon e formon. Është zgjedha e vullnetit të Tij, vullnet vërtetësie e dashurie”. Palio,
që shpreh shumë konkretisht edhe bashkimin e barinjve të Kishës me Pjetrin e me pasardhësit
e tij – vijoi Papa...: “... do të thotë edhe se ne duhet të jemi Barinj për
unitetin e në unitet e se, vetëm në unitetin, simbol i të cilit është Pjetri, prijmë
me të vërtetë drejt Krishtit”.