Падсакратар “Cor unum”: візіт кардынала Сара ў Беларусь адкрыў новыя гарызонты
Пасля візіта ў Беларусь
кардынала Робэра Сара, старшыні Папскай рады “Cor Unum”, падсакратар гэтай дэкастэрыі
кс. прэлат Сегундо Тэада Муназ, які суправаджаў іерарха падчас яго візіта, у інтэрвью
нашаму радыё адзначыў, што візіт кардынала Сара быў вельмі важным перш за ўсё для
таго, каб паказаць мясцоваму Касцёлу, які шмат пакутаваў ад вельмі жорсткага і закрытага
камуністычнага рэжыма, што ён з’яўляецца часткай паўсюднага Касцёла. “Прысутнасць
афрыканскага кардынала ў гэтым кантэксце вельмі ўразіла многіх людзей: дзеці глядзелі
на кардынала Сара з вялікім захапленнем”, - адзначыў кс. прэлат.
“Я думаю,
што для Касцёлаў такога тыпу, Касцёлаў, які шмат пакутавалі ад закрытасці, прысутнасць
такога іерарха як кардынал Сара, афрыканца, адкрывае новыя гарызонты; дае ім магчымасць
бачыць, што яны з’яўляюцца часткай Каталіцкага Касцёла. Гэта больш за ўсё падкрэслівалася
біскупамі і вернікамі. Людзям было радасна бачыць, што Касцёл, гэта не проста мікрарэальнасць,
але нешта вялікае і прыгожае”.
Кс. прэлат Муназ расказаў, што падчас візіта
кардынала Сара ў Беларусь, іерарх меў сустрэчы з супрацоўнікамі “Caritas” ў Віцебску
і Мінску. “Яны маюць цяжкасці ў працы ў сацыяльнай сферы, - сказаў падсакратар Папскай
рады - Гэтыя цяжкасці звязаны ў першую чаргу з недахопам інструментаў для працы.
Але мы бачылі вялікую колькасць святароў, законніц і свецкіх. Яны робяць тое, што
могуць. Маюць структуры вельмі маленькія, але вельмі жывыя”. “Касцёл тут адраджаецца
з вялікай сілай”, - сказаў кс. прэлат.
Іспанскі святар адзначыў, што новая
евангелізацыя ў Беларусі павінна праходзіць з апорай на моладзь. “Арцыбіскуп Мінска-Магілёўскі
адзначаў, што на Сусветныя дні моладзі едзе вялікая колькасць маладых людзей, Гэта
вялікае багацце. Трэба адштурхоўвацца ад гэтага. Мы не адзінокія. Рэальнасць Касцёла
ўключае ў сябе адносіны з рознымі іншымі народамі і рэальнасцямі, а таксама рознымі
шляхамі евангелізацыі. Трэба адзначыць, што вера тут захавалася дзякуючы цярпенню
людзей, якія падтрымлівалі яе на працягу ўсіх цяжкіх гадоў. І дзякуй Богу, зараз яны
перадалі веру новым пакаленням”.
Святар адзначыў, што для евангелізацыі ў
Беларусі вельмі важная адкрытасць на іншых. “У нашым глабалізаваным грамадстве неабходны
новыя мадэлі евангелізацыі, якія будуць уключаць у сябе адносіны з іншымі народамі,
Касцёламі, асобамі”, - падкрэсліў у інтэрв’ю нашаму радыё падсакратар Папскай рады
“Cor Unum” кс. прэлат Сегундо Тэада Муназ.