Кс. Анджэй Капроўскі: Ватыканскае радыё можа натхніць беларускае грамадства на салідарны
шлях да будучыні
17-22 чэрвеня з візітам
у Беларусі знаходзіўся намеснік Генеральнага дырэктара Ватыканскага радыё кс. Анджэй
Капроўскі. Ён наведаў Віцебск і Мінск. Падчас свайго візіту ён правёў сустрэчу з Канферэнцыяй
Каталіцкіх Біскупаў у Беларусі і стаў госцем некалькіх беларускіх СМІ: інтэрнэт-партала
TUT.BY, інфармацыйнага агенцтва “БелаПан”. Кс. Капроўскі сустрэўся таксама з кіраўніцтвам
Белтэлерадыёкампаніі і абмеркаваў планы магчымага супрацоўніцтва. У інтэрв’ю нашай
рэдакцыі ён распавёў падрабязна аб сваім візіце.
Перш чым прыехаць у Беларусь,
вы ужо чулі аб гэтай краіне. У СМІ ёсць шмат інфармацыі, існуюць розныя пункты гледжання
на жыццё беларускага грамадства. Што убачылі Вы і што Вас больш за ўсё ўразіла?
Сапраўды
існуюць розныя “медыйныя клішэ” аб кожнай краіне. Але мы ўжо прызвычаіліся глядзець,
не звяртаючы ўвагі на схемы, якія часта нясуць СМІ. Я ведаў, што Беларусь, як і Расія,
Украіна, Літва, а, у пэўнай ступені, усходняя частка Германіі, шмат пакутавалі ў перыяд
атэістычнага савецкага таталітарызма. Касцёл, як супольнасць, пачынае тут сваё адраджэнне,
амаль “з нуля”.
Калі я ехаў з мінскага аэрапорта ў Віцебск, бачыў вельмі добрыя
дарогі і дагледжаныя дамы. Гэта канешне не шмат значыць, бо заўсёды неабходна ўвайсці
ўнутр, каб убачыць тое, што стаіць на другім плане. Але, гэта дагледжанасць сведчыць
аб ўвазе насельніцтва да сваёй краіны. А больш за усё мяне ўразілі две цырымоніі:
абвяшчэнне новай катэдры ў Віцебску і 20-я гадавіна заснавання і адраджэння Мінска-Магілёўскай
Мітраполіі. У Мінску я ўбачыў актыўную прысутнасць вернікаў у грамадскім жыцці. У
Віцебску я таксама назіраў вельмі актыўных вернікаў, асабліва моладзь.
Працэсія
з Найсвяцейшым Сакрамэнтам праходзіла побач з будынкамі мясцовых уладаў, побач з помнікам
Леніну. Для мяне вельмі значнай з’яўляецца, прысутнасць хрысціянства і Евангелля ў
сітуацыях часта даволі складаных. Але, як кажа папа Бэнэдыкт XVI, гэта адказ на патрабаванне
новага спосабу сведчыць аб евангельскай любові, выражанай у грамадскім жыцці.
Падчас
Вашага візіту Вы сустракаліся з прадстаўнікамі беларускіх СМІ, перш за ўсё свецкіх.
Ці была ў іх заціўленасць Ватыканскім радыё і якія тэмы вы абмяркоўвалі?
Я
хачу сказаць, што гэты візіт у пэўнай ступені быў візітам ветлівасці, бо напрыканцы
красавіка ў Рыме былі прадстаўнікі і кіраўніцтва Беларускага радыё, якія прымалі удзел
у сустрэчы EBU (Еўрапейскага вяшчальнага саюза). Таму, сваім візітам у Беларусь я
хацеў падзякаваць беларускім калегам за іх удзел, а таксама выкарыстаць яго як магчымасць
паразважаць разам аб тым, што мы можам рабіць як грамадскае радыё. Таму што Ватыканскае
радыё, гэта таксама радыё, якое служыць грамадству.
Я прадставіў розныя аспекты
дзейнасці Ватыканскага радыё, асабліва для Афрыкі: нашу інтэрнэт-старонку www.africanews.it
на пяці мовах, а таксама розныя рубрыкі, якія мне здаюцца даволі цікавымі. Кожны тыдзень
мы сустракаемся з супрацоўнікамі афрыканскіх рэдакцый і выбіраем актуальныя тэматыкі
для гэтых рубрык. Мне здаецца гэтыя рэчы могуць быць цікавы таксама іншым радыёстанцыям,
таксама і свецкім. Я ўжо прадстаўляў гэтыя праэкты ў Лондане, Жэневе, падчас сустрэч
Еўрапейскага вяшчальнага саюза, таксама распавёў аб іх у Мінску.
Іншымі праектамі,
якія я прадставіў, былі: “Vatican TIC”, наша інтэрнэт-старонка і аўдыёвідэаплэер –
рэсурсы, дзякуючы якім можна сачыць за дзейнасцю Святога Айца. А яго дзейнасць часта
пераўзыходзіць рэлігійныя рамкі. Бэнэдыкт XVI вельмі звяртае ўвагу на ролю хрысціянства
ў грамадскім і кульурным жыцці. Падчас шматлікіх падарожжаў, як напрыклад у Венецыю,
Аквілею, Харватыю, Папа звяртаў увагу на супольныя праблемы грамадства і Касцёла.
Таму, я спрабаваў паказаць, што мы адкрытыя на супрацоўніцтва з іншымі СМІ, каб размаўляць
аб гэтых рэчах. Акрамя таго, мы закранулі пытанне аб магчымасці выкарыстання дзяржаўнымі
радыёстанцыямі ў Беларусі інфармацыйнага багацця Беларускай рэдакцыі Ватыканскага
радыё. Аднак, такія рэчы не вырашаюцца адразу. Яны патрабуюць глыбокага разважання
аб магчымых шляхах супрацоўніцтва і, мне здаецца, мы зараз знаходзімся ў добрых умовах,
каб рабіць гэта.
Якімі могуць быць плёны такога супрацоўніцтва для Ватыканскага
радыё з аднаго боку і беларускага грамадства з другога?
Я думаю,
варта пачакаць. Але магчымасці, якія мы маем, сапраўды вялікія, таму што Беларусь
мае глыбокія хрысціянскія карані. Я атрымаў у падарунак адзін альбом аб беларускіх
творах мастацтва – вельмі цудоўны альбом, якасна зроблены. І хачу прызнацца, што я
прысвяціў некалькі гадзін, каб праглядзець кожную яго старонку. Там я ўбачыў, што
хрысціянская традыцыя і хрысціянскія карані ў вашай краіне вельмі моцныя.
З
іншага боку, бачна, што сёння, як і ва ўсёй Еўропе, існуюць тэндэнцыі, каб выключыць
з грамадскага жыцця Бога і хрысціянства. Можа знікнуць кропка апоры. У такім выпадку,
Ватыканскае радыё, як частка Каталіцкага Касцёла, можа дапамагчы беларускаму грамадству
нанава адкрыць сваё культурнае багацце і натхніць на салідарны шлях да будучыні.
Акрамя
таго, вядома, што ў Беларусі пражывае праваслаўная большасць. Гэта праваслаўе, як
і каталіцтва, не заўсёды звязана з актыўным практыкаваннем веры і хрысціянскім стылем
жыцця. Праваслаўнымі ў Беларусі называюць сябе больш за 80% насельніцтва Беларусі.
Гэта не азначае, што ўсе яны практыкуючыя, але кожны з іх належыць да праваслаўнай
традыцыі. Таксама тут пражывае каля 15% людзей, якія адносяць сябе да каталіцкай традыцыі.
Мне здаецца, што Праваслаўная Царква і Каталіцкі Касцёл вельмі заклапочаны прысутнасцю
хрысціянства ў грамадскай сферы, умацаваннем маральных каштоўнасцяў, тым, каб даць
адвагу маладым пакаленням ісці наперад разумным шляхам, з адкрытасцю на Бога. Я убачыў,
што адносіны паміж Касцёлам і Царквой вельмі добрыя, таму, на мой погляд, мы, як Ватыканскае
радыё, мы маглі б падтрымаць намаганні ў гэтай сферы.