Delegacioni i Patriarkanës së Konstandinopojës, në Romë për solemnitetin e Shenjtorëve Pjetër e Pal.

(22.06.2011 RV)Për solemnitetin e shën Pjetrit e të shën Palit, Apostuj, Pajtorë të qytetit të Romës, vjen çdo vit një delegacion i Patriarkanës Ekumenike të Kostantinopojës, ndërsa një përfaqësi e Selisë Apostolike merr pjesë në kremtimet që mbahen në Stamboll, më 30 nëntor, në festën e shën Andreut.
Sivjet Patriku i Kostandinopojës do të dërgojë në Romë një delegacion të përbërë nga Fortlumturia e Tij, Emanuel, Metropolit i Francës dhe drejtor i Zyrës së Kishës Ortodokse pranë Bashkimit Evropian; peshkopi i Sinopit, Atenagoras, ndihmës i Metropolitit të Belgjikës dhe nga Arkimandriti Maksimos Pothos, mëkëmbës i përgjithshëm i Metropolitit të Zvicrës.
Më 29 qershor, njofton një notë zyrtare, delegacioni do të pritet në audiencë nga Benedikti XVI. Do të jetë i pranishëm edhe në kremtimin solemn, kryesuar nga Papa në Bazilikën e Vatikanit, në festën e Pajtorëve të Romës.

Prania e delegacioneve në festat e Pajtorëve, ështe një nismë e frytshme në dy drejtime. Së pari, shkëmbimi i vizitave të rregullta ndërmjet Romës e Kostandinopojës dy herë në vit është rast vërtetë i përshtatshëm edhe për shkëmbimin e informacioneve, për të mësuar të rejat nga jeta e të dyja Kishave si dhe për koordinimin e nismave. Së dyti, shkëmbimi i vizitave bëhet me rastin e dy festimeve të Shenjtorëve Pajtorë: shën Andreut, pajtor i Patriarkanës Ekumenike e shenjtorëve Pjetër e Pal, Pajtorë të Romës. E kjo tregon qartë se orientimi i dialogut i nënshtrohet lutjes drejtuar Zotit. Është orientim shpirtëror sepse, siç e ka kujtuar edhe Papa Gjon Pali II, në marrëdhëniet ekumenike duhet që kryet e vendit ta ketë lutja: lutja jep jetë, lutja drejton, lutja ndihmon. E ky është edhe kuptimi kryesor: bisedë e lutje!

Kujtojmë se, si zakonisht, Patriku Ekumenik, kur nuk vjen personalisht, dërgon një delegacion të përbërë nga bashkëpunëtorë të afërt të tij. Delegacioni kryesohet gjithnjë nga një metropolit.