60 orë adhurim për 60 vjetët e meshtarisë së Benediktit XVI
60 orë adhurimi eukaristik për shenjtërimin e meshtarëve e për t’iu lutur Zotit të
dërgojë punëtorë të rinj në vreshtën e vet. Është propozimi i prefektit të Kongregatës
për klerin, kardinalit Mauro Piaçenca për të gjithë ipeshkvijtë e botës. Është mënyra
për të festuar së bashku 60 vjetorin e shugurimit meshtarak të Papës Benedikti XVI,
që do të kremtohet më 29 qershor, në solemnitetin e shën Pjetrit e të shën Palit Apostull.
Kemi para mikrofonit tonë vetë kardinalin: Kongregata,
duke qenë për Klerin, e ndjen në mënyrë të veçantë një përvjetor të këtij lloji, shugurimin
meshtarak. Pyetëm veten se ç’dhuratë mund të ishte më e përshtatshme, më e pëlqyeshme
për kremtimin e këtij përvjetori. Përgjigjia është e lehtë: asgjë nuk është më e çmuar
se lutja. Prandaj, u shkruam të gjithë ipeshkvijve të botës, duke pasur parasysh edhe
Ditën për shenjtërimin e meshtarëve, e cila përkon me të kremten e Zemrës së Krishtit,
që këtë vit festohet më 1 korrik. Në letër kërkojmë 60 orë, aq sa janë vitet e meshtarisë
së Atit të Shenjtë: 60 orë lutjeje të thellë para të Shenjtnueshmit Sakrament, 60
orë adhurimi nga meshtarët e çdo dioqeze. Qëllimi është ta falenderojmë Zotin për
meshtarinë në vetvete, për dhuratën, që i ka bërë Kishës dhe botës, duke zgjedhur
papë, Benediktin XVI, të cilin duam ta rrethojmë me dashuri e bashkim. I kërkojmë
Hyjit edhe shenjtërimin e krejt klerit. Janë mobilizuar 3.100 dioqeza, të cilave mund
t’u shtojmë kuvendet, shtëpitë e rregulltarëve, qendrat e përshpirtërisë e kështu
me radhë. Gjithsej, duhet të jenë rreth 186 mijë orë adhurimi. Natyrisht nuk kemi
ndërmend këtu të bëjmë thjesht llogari matematike, por numrat na ndihmojnë të entuziazmohemi.
Çdo çast i kaluar me Zotin e gjallë e të vërtetë në Eukaristi është dhuratë për të
gjithë njerëzit e adhurimi i Hyjit është në vetvete ungjillëzim, pra pasuri për krejt
Kishën. Këtë ka për zemër edhe Benedikti XVI.