՜՜Դպրեվանքը Մարդիկը Առաքեալ Կը Դարձնէ Ու Ծառայութեան Կը Կոչէ՝՝ Կ՝ըսէ Արամ Ա. Կաթողիկոսը։
Երկուշաբթի 20 Յունիսին ( 2011) երեկոյեան, տեղի ունեցաւ Մեծի Տանն Կիլիկիոյ Կաթողիկոսութեան
Դպրեվանքի 81-րդ ուսումնական-կրթական տարեշրջանի փակման հանդիսութիւնը , Դպրեվանքի ՙԲրաբիոն
Տումանեան՚ հանդիսասրահին մէջ, Պիքֆայա, հովանաւորութեամբ եւ նախագահութեամբ Արամ Ա.
Կաթողիկոսին: Դպրեվանքի տեսչութեան կողմէ պատրաստուած յատուկ յայտագրի հիման վրայ, կատարուեցաւ
Աւետարանէն եւ ՙՆարեկ՚ աղօթամատեանէն ընթերցում մը զոր կատարեցին Ընծայարանական սարկաւագները:
Ապա, երգախառն կատարումով, Դպրեվանքի երգչախումբը ներկայացուց Միսաք Մեծարենցի քերթուածներէն
կատարուած համադրում մը, ղեկավարութեամբ՝ Հոգշ. Տ. Մակար Վրդ. Աշգարեանի: Յանուն շրջանաւարտներուն,
շնորհակալութեան խօսք ուղղեց նորընծայ Հոգշ. Տ. Շնորհք Աբղ. Աշըգեան՝ երախտագիտութիւն
յայտնելով Վեհափառին, տեսչութեան եւ ուսուցչակազմին, որոնք անցնող ինը տարիներուն մեծ
դեր ունեցան իրենց հոգեմտաւոր կազմաւորման մէջ: Տեսչական տեղեկագիրով Գերշ. Տ. Շահէ Եպս.
Փանոսեան անդրադարձաւ անցնող տարեշրջանին կատարուած ուսումնական-կրթական աշխատանքին՝
յատկապէս յիշելով տեսչական եւ ուսուցչական կազմերուն գործունէութիւնը, ուսանողութեան
եկեղեցական, կրթական եւ ընկերային առօրեան եւ ի վերջոյ այս տարուան հունձքը, որ չորս
նորընծայ աբեղաներով կու գայ զօրացնել Մեծի Տանն Կիլիկիոյ Միաբանութեան շարքերը: Ան նշեց
նաեւ որ երկու քահանայացուներ ալ կ’աւարտեն իրենց ընթացքը, մէկը Ս. Ընծայարանէն, իսկ
միւսը՝ քահանայից պատրաստութեան դասընթացքէն: Տեսուչ Սրբազանը շնորհակալութեան իր խօսքը
ուղղեց նաեւ Դպրեվանքին նիւթապէս զօրավիգ կանգնած բոլոր բարերարներուն, եւ մեր ժողովուրդի
զաւակներուն, որոնք կը սիրեն Դպրեվանքը ու կը գուրգուրան անոր վրայ: Ապա, Տեսուչ Սրբազանը
հրաւիրեց Վեհափառը բաշխելու վկայականները եւ տալու իր հայրապետական պատգամը: Արամ Ա.
Կաթողիկոս իր խօսքին մէջ գնահատեց յայտնի կամ անյայտ բարերարները յատկապէս յիշելով
Գալուստ Կիւլպէնկեան հիմնարկութիւնը, Փիւնիկ հիմնադրամը եւ Խ. Պապիկեան ֆոնտը: Վեհափառը
նաեւ անդրադարձաւ Մեծի Տանն Կիլիկիոյ Կաթողիկոսութեան, անոր Դպրեվանքին ու Միաբանութեան
առաքելութեան: ՙԴպրեվանքը մարդ առաքեալ կը դարձնէ ու ծառայութեան կը կոչէ-ըսաւ ան-մենք
միշտ ըսած ենք ու կրկնութեան սիրոյն պիտի յիշեցնենք դարձեալ, թէ որակին կը հաւատանք եւ
ոչ թէ քանակին՝՝: Ապա թելադրեց միշտ Դպրեվանքը տանիլ իրենց հետ, իբրեւ ոգի, իբրեւ գիտութիւն
եւ իբրեւ ծառայութիւն, անկէ ճառագայթող լոյսը ի սպաս դնելով մեր ժողովուրդի հոգեւոր ու
իմացական լուսաւորման: Ապա Դպրեվանքի տեսչութիւնը ընդունելութեամբ պատուեց ներկայ հանդիսականները: