Кардынал Пэлл: эўтаназія гэта перамога страху над мужнасцю
Мітрапаліт Сіднэя,
кардынал Джордж Пэлл скіраваў спецыяльны пастырскі ліст да вернікаў, у якім сцвярджае,
што закон, які дазваляе эўтаназію гэта “вельмі слізкі шлях”. Іерарх адзначае, што
права, якое дазваляе добраахвотную эўтаназію ці “забойства з літасці” хутка пераўтвараецца
ў эўтаназію супраць волі пацыента.
Мітрапаліт звярнуў увагу на тое, што секулярызм
мае вялікі ўплыў на жыццё аўтралійскага грамадства. Гэта асабліва бачна ў СМІ і ў
культуры. Іерарх ў гэтым кантэксце падкрэсліў важную ролю католікаў дактароў, медсёстраў,
бацькоў, настаўнікаў і святароў, заданнем якіх з’яўляецца тлумачыць людзям пытанні,
што тычацца такіх з’яваў як аборт ці кланаванне чалавека.
Кардынал падкрэсліў
у сваім звароце, што забойства паміраючага чалавека, які просіць скараціць свае пакуты,
гэта перамога страху і прагматызма над мужнасцю. “Мы павінны звярнуцца да маральных
прынцыпаў, якіх нельга адмаўляць, і якія ўвасобленыя ў натуральным праве і якія падцвердзіў
сам Хрыстус і Яго дзесяць запаведзяў”, - сказаў мітрапаліт Сіднэя.