Presidenti i Sirisë nuk largohet, Brukseli studion sanksione të reja
Ekziston një kompllot i huaj kundër Sirisë, fati i së cilës varet nga dialogu i brendshëm,
pas muajve me protesta në të gjithë vendin: ky është qëndrimi i presidentit sirian
Bashar al-Asad, në fjalimin e tretë para kombit, mbajtur në Universitetin e Damaskut,
në të cilin pranon që manifestimet janë edhe shfaqje të kërkesave të drejta popullore.
Sipas tij, në këtë çast, është e rëndësishme të vendoset qetësia dhe paqja në vend,
në mënyrë që t’u hapet rruga reformave.
Duke i rreshtuar njëra pas tjetrës,
Asad foli për ligjin e ri zgjedhor, impenjimin për çrrënjosjen e korrupsionit, ndryshimin
ose reformimin e krejt Kushtetutës, mundësinë për amnisti dhe për ligjin që lejon
partitë e reja.
Nga ana tjetër, asnjë gjest për tërheqjen e trupave, asnjë
fjalë për përgjegjësitë e regjimit në masakrat e forcave të rendit, asnjë hamendje
për t’u dhënë siguri se nuk do të dënohen atyre, që mund të kthehen nga jashtë në
Siri. I pashmangshëm vazhdimi i protestave të opozitës, që edhe sot doli në sheshe
në shumë qytete siriane. Dje, aktivistët themeluan një Këshill Kombëtar, që do të
udhëheqë luftën kundër regjimit.
Nga ana e tij, Bashkimi Evropian përgatitet
për vendosjen e sanksioneve të reja kundër Sirisë. Në dokumentin e diskutuar sot në
Luksemburg, flitet për shtrirjen e masave kufizuese, duke shtuar rreth dhjetë njerëz
të tjerë të regjimit e disa shoqëri në listën e zezë me 23 eksponentë sirianë, të
cilëve u ndalohet të vijnë në Evropë dhe u janë bllokuar pasuritë.