Java evropiane e Historisë fetare mbi Krishterimin në lindje të Perandorisë Romake
Përhapja e Krishterimit në lindje të Perandorisë Romake, deri në detin e Kinës: kjo
do të jetë tema e Javës së 33-të evropiane e Historisë fetare, promovuar nga fondacioni
ambrozian Pali VI, njofton agjencia katolike Sir. Ngjarja, organizuar së bashku nga
Universiteti katolik dhe rajoni Lombardia, do të zhvillohet nga data 6 deri më 10
shtator në Varese pranë Viles Cagnola di Gazzada. Kanë filluar edhe regjistrimet për
pjesëmarrje. “Përhapja e Ungjillit në lindje të Perandorisë Romake – shpjegojnë organizatorët
– qysh në lashtësi në Azi ka bërë të lindin forma të ndryshme të Krishterimit autokton,
në një ballafaqim të drejtpërdrejt me tradita e shumta fetare”. Java kushtuar historisë,
vijojnë organizatorët, “paraqet një pasuri me përmbajtje të çmueshme edhe në këndvështrimin
e formimit për vetëdijesim të hapur ndaj dialogut mes realiteteve antropologjike e
fetare të ndryshme, që sot i duhet atij njeriu që dëshiron të jetojë në realitetin
e ndërlikuar të një bote të globalizuar”. Në program, që mund të konsultohet në
faqe të internetit, parashikohen ligjërata mbi krishterimin antiokenë, siro-maronitë
e mbi konfrontimin e tyre me fenë islame. Do të trajtohet edhe tema e persekutimit
të të krishterëve në Kurdistan e në Armeni. Ndër relatorët, përmendim pjesëmarrjen
e Christian Hannick, nga Universiteti i Wurzburgut të Gjermanisë, të mons. Louis Sako,
kryeipeshkëv i Kerkukut të Kaljdevëve në Irak, të libanezit Samir Kahlil Samir, nga
Bejruti, dhe Jose Kochuparampil, nga shteti indian I Keralas.