Benedikti XVI, në Republikën e San Marinos, u kërkon besimtarëve të kthehen në fenë
e të parëve. Në Lutjen e Engjëllit të Tënzot, bën thirrje për refugjatët
“Të dashur samarinezë, qëndrojini thellësisht besnikë trashëgimisë së ndërtuar
në shekuj, me nxitjen e Pajtorëve tuaj të mëdhenj, Marinit dhe Leonit”.... Dëgjues të nderuar
po e fillojmë programin me vizitën e Papës Benedikti XVI në dioqezën e San Marino-Montefeltros,
ku Ati i Shenjtë kaloi gjithë ditën e sotme në republikën e pavarur, brenda territorit
italian. Është hera e dytë, pas Karol Vojtilës, që një papë vjen të shohë besimtarët
e republikës së lashtë. Fjalët, që sapo dëgjuat, mund të konsiderohen amaneti, që
u la atyre Papa Racinger. Tri, pikat kulmore të vizitës: Mesha e paradites dhe
Lutja e Engjëllit të Tënzot, në stadiumin e Serravales, së bashku me 22 mijë besimtarë,
25 kardinaj e ipeshkvij dhe 200 meshtarë; pasdite, takimi me autoritetet, apo me Kapitenët
Regjentë, siç quhen udhëheqësit e San Marinos, si edhe me krejt kongresin e me Trupin
Diplomatik dhe; në mbrëmje, takimi me të rinjtë në sheshin Viktor Emanueli të Penabilit.
Tingujt
e këmbanave në të gjitha kishat e San Marinos dhe atmosfera festive, që ndihej kudo,
shoqëruan ardhjen e Papës në Republikën e vogël, që i ka rrënjët në krishterim. Kisha
e saj është 1700 vjeçare, lindur nga ungjillëzimi i dy shenjtorëve, që i përmendi
edhe Benedikti XVI, shën Marini e shën Leoni, ardhur në këto male nga Kroacia. Nga
ky ungjillëzim lindi më vonë përvoja e jashtëzakonshme shoqërore, që karakterizoi
historinë e Republikës së Titanit, malit nga ku fillojnë kufijtë e këtij shteti. Në
Meshën e paradites, Papa kujtoi festën e sotme të Trinisë Shenjte dhe komentoi lirtugjinë: “Tekstet
e sotëm të Meshës së Shenjtë flasin për Zotin, prandaj flasin për dashurinë: nuk ndalen
aq në Misterin e Tri Vetjeve, por në dashurinë, që përbën thelbin dhe unitetin e trinisë
njëkohësisht”. Duke iu kthyer më pas, rrugës së lashtë të fesë, që ka përshkuar
populli samarinez, Benedikti XVI u bëri thirrje besimtarëve ta konsiderojnë atë si
pasuri për qytetërimin e sotëm. U kujtoi edhe besnikërinë e tyre ndaj Ipeshkvit të
Romës dhe traditën e përkushtimit të thellë ndaj Shën Marisë Virgjër. Në kohën e sotme,
vërejti Ati i Shenjtë, nuk mungojnë vështirësitë e pengesat, për shkak të modeleve
të hedonizmit e të relativizmit në shoqëri, të cilat e shtyjnë njeriun të mendojë
se vetëm progresi tekniko-shkencor është i rëndësishëm e jo feja. Kështu, theksoi
Papa, zhvendoset vëmendja nga njeriu. Temë kjo, që Benedikti XVI e preku edhe gjatë
Lutjes së Engjëllit të Tënzot, po në stadiumin e Serravales, duke kujtuar se nesër
bie Dita Botërore e Refugjatit, rast, për ta kthyer vëmendjen e për ta vënë njeriun
në qendër, njeriun në nevojë, atë të persekutuarin, që detyrohet të ikë nga vendi
i vet: “I ftoj autoritetet civile dhe çdo njeri vullnetmirë të garantojnë mikpritje
dhe kushte të denja jetese për refugjatët, në pritje të mundësisë për t’u kthyer lirisht
e të sigurtë në atdhe” Benedikti XVI kujtoi edhe lumnimin e sotëm në Dax të
Francës të motër Margaretë Rutan, e kongregatës së Bijave të Bamirësisë, e cila u
dënua me vdekje nga jakobinët gjatë Revolucionit Francez, për shkak të fesë së saj
katolike e besnikërisë ndaj Kishës.