Кардынал Сара заклікаў беларускіх вернікаў жыць верай і сведчыць аб ёй у сваіх асяродках
18 чэрвеня, падчас урачыстай св. Імшы ў Віцебску з нагоды абвяшчэння новага катэдральнага
касцёла, спецыяльны пасланнік Святога Айца кардынал Робэр Сара, звярнуўся да сабраных
вернікаў з гаміліяй, у якой адзначыў, што “ўрачыста абвяшчаючы сёння новую катэдру,
мы павінны перш за ўсё памятаць гісторыю Касцёла ў Віцебску: памятаць пра балючыя
і цяжкія выпрабаванні, праз якія ён прайшоў у нядаўнім мінулым, памятаць пра вернасць,
з якой ён ішоў за сваім Панам нават у тых сітуацыях, якія знешне здаваліся пустыняй”.
Іерарх заўважыў, што сёння, негледзячы на тое, што “змяніліся сацыяльныя і грамадскія
ўмовы, у якіх мы жывём, не змяніўся і не знік голад Бога, а таксама праўда пра тое,
што кожны чалавек мае патрэбу ў Богу”. Акрамя таго, Папскі пасланнік заклікаў вернікаў
“да жыцця верай і сведчання аб ёй у сваіх асяродках: у сям’і, на працы, у сферы культуры
і інфармацыі, у спорце, у войску, сярод незлічонага мноства слабых і зраненых жыццём
людзей”. “Паміраючы для саміх сябе і клапоцячыся пра іншых, як пра саміх сябе, мы
спазнаем праўду Хрыстовых словаў: “Больш шчасця ў тым, каб даваць, чым у тым, каб
браць”, - сказаў віцебскім вернікам сабраным на ўрачыстасці абвяшчэння новай катэдры
кардынал Сара.