Mons. Gaenswein: Papa gjatë kësaj vere do të punojë në librin kushtuar Jezusit
“Po, Ati i Shenjtë vijon të shkruaj librin e tij mbi Jezusin e Nazaretit”. Kështu
tha sekretari i veçantë i Papës Benediktit XVI, mons. Goerg Gaenwein, në mbarim të
një kremtimi mbajtur në Universitetin Katolikë ‘Sacro Cuore’, duke përgjigjur në pyetje
lidhur me vëllimin e tretë të librit të Papës kushtuar Jezusit të Nazaretit. Mons.
Gaenswein shtoi se “gjatë verës në Kastel Gandolfo, Benedikti XVI do të vijojë punën
e tij në përpilimin e tekstit. Ati i Shenjtë do të transferohet në rezidencën papnore
në Kastel Gandolfo, 33 km në jug të Romës, më 5 korrikun e ardhshëm. Aty do të qëndrojë
deri në mbarim të shtatorit, me një ndërprerje nga 18-21 gusht për udhëtimin apostolik
në Madrid me rastin e Ditës Botërore të Rinisë. Gjithnjë në shtator më datën 11 Papa
do të vizitojë qytetin Ankona në detin adriatik, me rastin e mbylljes së Kongresit
Eukaristik Kombëtar Italian. Më vonë, nga 22 deri më 25 shtator Papa Racinger do të
vizitojë Gjermaninë, në udhëtimin e tretë të tij, pas vizitës në Këln në gusht të
vitit 2005, me rastin e Ditës Botërore të Rinisë së atij viti, dhe në Bavari në shtator
të 2006. Benedikti XVI filloi të shkruante librin më 2003, e pastaj në prill të
vitit 2005 u zgjodh Papë, e që atëherë Ati i Shenjtë ka përfituar tërë kohën e lirë
për të kompletuar veprën që kishte për zemër prej kohësh t’ia kushtonte Mësuesit Hyjnor,
Jezusit të Nazaretit, “real e historik” e siç pohoi vet Papa, Krishti është figurë
“historikisht i arsyeshëm e bindës”.