Papa viziton të dielën dioqezën e San Marino-Montefeltro.
Një dioqezë shumë aktive, kjo që do të vizitojë Benedikti XVI. Veprimtaritë e saj
mund t’i njohim me hollësi përmes revistës “Montefeltro”, që i kushon një numër të
veçantë vizitës së Papës. Intervistuam, me këtë rast, drejtorin e revistës, Françesco
Partizani, i cili na flet pikërisht për këtë nismë editoriale:.......
Përgjigje:
- Janë kontribute të disa miqve, posaçërisht të ipeshkvit tonë, që flasin
për rëndësinë e kësaj ngjarjeje, të cilën do ta jetojmë këtë të dielë e që, sidomos,
na ndihmojnë të përgatitemi sa më mirë shpirtërisht, për ta pritur Papën me krahë
hapur.
Pyetje: - Kemi dëgjuar se mijëra vetë kanë bërë kërkesë
për të marrë pjesë në Meshën, që do të kryesohet nga Papa më 19 qershor. Si po përgatitet
bashkësia vendase për këtë takim?
Përgjigje: - Është përgatitur
shumë mirë, sepse këtë përgatitje e ka filluar prej muajsh. Nisma më e rëndësishme
ishte edhe më e ndjekura: shtegtimi i Marisë. Është fjala për shtegtimin e figurës
së Zojës së Hireve, që ruhet në një afresk në Penabili, në shenjtëroren me të njëjtin
emër, në të gjitha famullitë e dioqezës. E çdo takim me Zojën tonë të hireve, u parapri
e u pasua nga takime të tjera përgatitore, nga çaste lutjesh, kremtime të posaçme
liturgjike etj. etj. Të gjitha kremtimet u ndoqën nga një numër i madh besimtarësh,
që morën pjesë në to me fe të gjallë.
Pyetje: - Ç’prisni nga kjo
vizitë e Benediktit XVI?
Përgjigje: - Papa takohet me një
Kishë të veçantë, jo vetëm sepse është gjografikisht e pashoqe, nga që bashkon në
një, dy shtete sovrane – San Marinon e Italinë. Takohet me një Kishë të lashtë, të
pasur me tradita të shkëlqyera fetare. Kemi edhe sot e kësaj dite manifestime të dukshme
të dashurisë së krishterë, që ne i ruajmë me kujdes të jashtëzakonshëm, si thesare
të vërteta.
Pyetje: - E dimë se bashkësia juaj është plot gjallëri;
e edhe plot veprimtari në fushën shoqërore. Cilat janë më të spikaturat në shoqërinë
vendase, e cilat, problemet më shqetësuse?
Përgjigje: - Veprimtaritë
misionare: kemi një lëvizje të vërtetë misionare, që lidhet me mbarë botën. Zyra jonë
misionare është e pranishme në vendet e Amerikës Latine, në vendet e Afrikës e në
vendet e Evropës Lindore, përmes disa shoqatave, që janë vërtetë krenaria jonë. Ndërsa
problemet lidhen me vështirësitë që kanë të bëjnë me punësimin e u krijojnë një shqetësim
jo të paktë, sidomos të rinjve. Kemi shumë të papunë e edhe shumë ndërmarrje në krizë,
gjë që nuk mund të mos krijojë edhe një situatë të tensionuar, tipike për rrethana
të tilla. E Papa do të flasë edhe për këtë.
Të dielën Benedikti XVI do
të ndalohet edhe në Penabili, në provincën e Riminit, seli ipeshkvnore e dioqezës
së San Marino-Montefeltro. Këtu, përveç katedrales, ku do të ndalohet për të adhuruar
të Shenjtnueshmin Sakrament, Papa do të takohet edhe me të rinjtë, që do ta presin
në Sheshin Viktor Emanueli. Por, si po përgatitet kjo qendër e vogël, për takimin
e madh? Në mikrofonin tonë, kryetari i bashkisë së Penabil-it, Lorenco Valenti:
Përgjigje:
- Natyrisht që përgatitet prej kohe për këtë vizitë, për ne epokale, Qytetarët
kanë krijuar edhe një komitet të posaçëm për organizimin e pritjes së Papës. Kështu,
mund të them se ne të gjithë: autoritetet, admnistrata e populli, rreth trimijë vetë,
po përgatitemi për ta pritur Benediktin XVI në festë, e, sidomos, me gjithë zemër! Penabili
është kryqendra e Montefeltros. Jemi një qytezë malore, e natyrisht vuajmë nga problemet,
që krijon malësia. Por jetojmë me shpresë se do të na gjallërojë shumë turizmi, sepse
kemi shumë gjëra të bukura: pyje, lagje historike tejet tërheqëse, gastronomi të posaçme.
E të gjitha këto nuk mund të mos i tërheqin dashuronjësit e malit. Ndonëse edhe shumë
vendas ikin, për të kërkuar kushte më të mira jetese. Dëshirojmë që forcat më të mira
të mbeten këtu e shpresojmë se Papa do të na nxisë për të qenë gjithnjë protagonistë
të ardhmërisë sonë.