Lutje për Papën – sonte, në Sheshin e Shën Pjetrit.
Sonte, në orën 21.00, nis lutja e besimtarëve të shumtë mbledhur në Sheshin e Shën
Pjetrit në Vatikan, për Papën e Papninë e tij. Kryesohet nga kardinali Anxhelo Komastri,
mëkëmbës i përgjithshëm për Qytetin e Vatikanit. Takimi i uratës organizohet nga Lëvizja
e Dashurisë Familjare, që dëshiron t’i shprehë Papës me lutje, dashurinë, nderimin
e afërsinë. Për këtë natë të re lutjesh, kushtuar papnisë së Benediktit XVI, në mikrofonin
tonë, don Stefano Tardani, themelues i Lëvizjes së Dashurisë Familjare:......
Përgjigje:
- Është viti i shtatë që Lëvizja jonë organizon mbrëmësore lutjeje për
Atin e Shenjtë e për Papninë e tij. Ndërmjet tjerash, sivjet kemi dhuratën e 60-vjetorit
të shugurimit meshtarak të Atit të Shenjtë, që do të kremtohet më 29 qershor: kemi
pra, rast vërtet të përshtatshëm, për t’u mbledhur këtu e për t’u lutur. E sivjet
duam të lutemi në mënyrë të veçantë, duke i ftuar gjithë të krishterët të bashkohen
me zemër e me shpirt me ne, për Atin e Shenjtë, për rëndësinë e figurës së tij e të
shërbimit të tij në krye të Kishës Universale. E t’i kërkojmë Zotit hirin dhe dritën
e fesë për aspektet e ndryshme të jetës; për problematikat, që presin zgjidhje; situatat,
që shpesh bëhen burim konfliktesh në jetën e përditshme, për paqen e ngushëllimin
e të gjitha zemrave. Sivjet Rruzares do t’i prijnë Misteret e Dhimbshme,
përgatitur e komentuar nga vetë familjet, që do ta pasurojnë këtë natë edhe me këngë
e me dëshmi të ndryshme.