Біскупы Ірландыі: Касцёл стаў больш бяспечным месцам
У Ірландыі закончылася
пасяджэнне Канферэнцыі Каталіцкіх Біскупаў гэтай краіны. У выніковым дакуменце апублікаваным
епіскапатам сцвярджаецца, што “сёння Касцёл стаў больш бяспечным месцам для дзяцей
і моладзі чым раней”. Паводле іерархаў гэтага стала магчымым дзякуючы “вялікім намаганням
з боку тысяч вернікаў і існаванню спецыяльнага камітэта, што працаваў над працэдурамі,
пры дапамозе якіх стала магчымым праводзіць кансультацыі, назіранні і даследванні”.
Біскупы прызнаюць, што маніторынг праводзіўся “даўжэй чым чакалася з прычыны асаблівай
павагі да права чалавека аб ахове дадзеных аб ім”. Іерархі заклікалі ўрад краіны прыняць
неабходныя меры, каб спецыяльна створаны камітэт па абароне дзяцей у Каталіцкім Касцёле
ў Ірландыі мог свабодна праводзіць сваю місію “атрымліваючы інфармацыю ад касцельных
ўстановаў і дзелячыся ёй”.
Акрамя таго падчас пленарнай сесіі, ірландскія біскупы
адакладнілі план святкаванняў 60-годдзя святарства папы Бэнэдыкта ХVI. Іерархі заклікалі
вернікаў 29 чэрвеня прыняць удзел ў 60-гадзіннай эўхарыстычнай адарацыі, молячыся
за святароў і аб дары новых і святых пакліканняў да святарства. Таксама ірландскія
біскупы з вялікай надзеяй глядзяць на Міжнародны Эўхарыстычны Кангрэс, які ў наступным
годзе пройдзе ў Дубліне. “Касцёл мае патрэбу ў аздараўленні і прымірэнні, таму Эўхарыстычны
Кангрэс дасць нам магчымасць аднавіцца”,- сцвярджаюць ірландскія біскупы у сваім паведамленні.