Պենետիկտոս ԺԶ Սրբազան Քահանայապետը Կիրակի 19 Յունիսին Կ՛այցելէ Սան Մարինոյի Հանրապետութիւնը:

Կիրակի 19 յունիսին՝ Նորին Սրբութիւնը միօրեայ ճամբորդութեամբ մը պիտի այցելէ Սան Մարինօյի փոքրիկ հանրապետութիւնը, ուր առաւօտեան ժամը 10ին պատարագ պիտի մատուցանէ ''Սեռավալլէ'' կոչուած մարզադաշտին մէջ։ Իր այս այցելութեան ընթացքին Սրբազան Քահանայապետը տեսակցութիւն պիտի ունենայ պետական ու եկեղեցական իշխանութիւններուն հետ։ Կիրակի երեկոյեան Վիթթորիօ Էմմանուէլէ հրապարակին վրայ Նորին Սրբութիւնը հանդիպում պիտի ունենայ Սան Մարինօ - Մոնթէֆէլթրօ Թեմի երիտասարդներուն հետ։ Իսկ ժամը 21ին Սրբազան Քահանայապետը Վատիկան պիտի վերադառնայ։
Նշենք թէ Սան Մարինօ - Մոնթէֆէլթրօ թեմը ունի 800 քմ քառակուսի տարածութիւն երկու անկախ պետութիւններէ կազմուած` Իտալիա եւ Սան Մարինօ։ Թեմը ունի 63 հազար հաւատացեալ, 81 Ժողովրդապետութիւն որոնցմէ 12ը Սան Մարինոյի մէջ իսկ 69 իտալիոյ մէջ։ Թեմի առաջնորդն է գերապայծառ Լուիճի Նէկրի։