Papa: katekistët të mësojnë katekizmin e fesë pa interpretime personale. Besnikëria
ndaj Kishës duke pas parasysh kontekstin, moshën e kulturën.
Benedikti VI hapi në Lateran kuvendin dioqezan të Romës duke ftuar çdo të pagëzuar
të kumtojë Ungjillin. Në këtë moment historik çdo besimtarë i pagëzuar është
i thirrur të kumtojë Ungjillin. Ky kumtim “duhet të jehojë përsëri në rajonin e traditës
së lashtë të krishterë”. Askush nuk përjashtohet nga kjo detyrë themelore që Papa
Benedikti XVI ia besoi të gjithë anëtarëve të Kishës e posaçërisht besimtarëve të
Romës. Këtë e bëri mbrëmë më 13 qershor në bazilikën romake të shën Gjonit në Lateran. “Ungjillëzimi
– tha Papa Racinger – na bënë të ditur se Zoti është afër: Zoti na është dëftuar”.
Është treguar në mishërimin e Krishtit, ku i zbulon njeriut fytyrën e vet të vërtetë. “Katekizmi
është vepër kishtare e si e tillë është e nevojshme që katekistët, mësuesit e doktrinës
së fesë ta mësojnë, transmetojnë e dëshmojnë fenë e Kishës e interpretimin e tyre”.
Kështu Papa Benedikti XVI u tërhoqi vëmendje dje në mbrëmje në ndërhyrjen e tij në
bazilikën romake të Shën Gjonit në Lateran, ku përuroi punimet e Kuvendin kishtar
që mbyll vitin baritor të dioqezës së Romës. Një vërejtje e Papës kjo e shoqëruar
me një thirrje: “Besnikëria ndaj fesë së Kishës, që pastaj duhet të gërshetohet me
një ‘krijimtari katekistike’ që ka parasysh kontekstin, kulturën dhe moshën e atyre,
të cilëve u drejtohet mësimi i të vërtetave të fesë, pra, katekizmi”. Benedikti
XVI kujtoi se “pikërisht për këtë edhe është realizuar Katekizmi i Kishës Katolike,
i cili idealisht këtë mbrëmje iu dorëzohet të gjithë ju, katekist e prindër, në mënyrë
që Kisha e Romës të mund të angazhohet me gëzimin e përtërirë në edukimin e fesë. Struktura
e katekizmit vjen nga përvoja e katekumenatit të Kishës së shekujve të parë e merr
elementet themelore që e ndihmojnë njeriun të bëhet i krishterë, e këto elemente janë:
feja, Sakramentet, urdhërimet e Tënzot, lutja Ati Ynë”, tha Papa. “Për të gjithë këtë
– shtoi Ati i Shenjtë Racinger – është i nevojshëm edukimi i heshtjes, i brendësisë
së shpirtit”. Papa nënvizoi se, edhe në Romë, ashtu si kudo në botë, “janë shumë
ata njerëz që ende nuk e kanë takuar Zotin: atyre – tha Benedikti XVI – u drejtohet
vëmendja e veçantë baritore e Kishës”.