Kardinali Ravazi organizon më 10 shtator takimin “Muzika e feja” në Umbria të Italisë
Kardinali Ravazi do të organizojë më 10 shtator takimin “Muzika e feja” në kuadrin
e edicionit të 66-të të festës popullore muzikore në Umbria të Italisë. “Nga
Bota e vjetër, në të renë”, a, më qartë, lidhjet muzikore të Evropës me Amerikën,
nga vitet ‘600, në ato ‘900. Kjo është tema e edicionit të 66-të të festës popullore
muzikore umbre. Është festival i mirënjohur në botë, që jep ndihmesë të shquar,
sidomos, për muzikën kishtare. Sivjet i kushtohet kompozitorit Francesco Siciliani,
në njëqind vjetorin e lindjes. Festa muzikore do të hapet të shtunën, më 10 shtator,
me takimin e titulluar “Muzika e Feja”, organizuar me nismën e Kardinalit Xhanfranko
Ravazi, kryetar i Këshillit Papnor të Kulturës, për t’i dhënë një shtytje të
re dialogut muzikor ndërmjet Kishës e kulturës muzikore të shekullit XXI, dialog me
rëndësi e me vlerë jo të paktë për Kishën e për botën, siç e shpjegon, në mikrofonin
tonë, drejtori artistik i Festivalit, Alberto Batisti:
Përgjigje: -Kardinali
dëshiron të rihapë dialogun me kulturën bashkëkohore në përgjithësi. Mjafton të kujtojmë
‘Oborrin e paganëve’. E kjo ka rëndësi të madhe, sepse në fushën muzikore nuk kemi
ende ndonjë formë të spikatur bisede me muzikën bashkëkohore, që të ndikojë edhe në
përtëritjen e muzikës në liturgji.
Pyetje: - Të kujtojmë temën e këtij
viti: “Nga Kontinenti i vjetër, në të riun, lidhjet ndërmjet dy brigjeve të oqeanit”,
marrëdhëniet muzikore. Ju niseni nga vitet ‘900 dhe i propozoni posaçërisht, përmes
figurës së Bernshtajnit, protagonist i shumë koncerteve, që në zanafillë të lidhjeve
muzikore ndërmjet Evropës e Amerikës...
Përgjigje: - Po, Jordi Saval,
në koncertin e tij të San Bevignate, do të kujdeset të vërë në dukje pikërisht këtë
shkëmbin muzikor ndërmjet ‘conquistadores”, apo pushtuesve spanjollë - që sillnin
me vete muzikën e tyre iberike, dhe traditave popullore, të cilat pastaj bënë të lindte
muzika kreole, sythe iberike shartuar mjeshtërisht në trungun e traditave vendase.
Pastaj ungjillëzimi i Amerikave, përmes figurave të polifonistëve të mëdhenj të botës
së re, solli në Evropë sythet nga muzika e Botës së re. Janë kompozime vërtet prekëse,
që na çojnë nga Meksika, në krijimet jezuitike të Argjentinës, të Bolivisë, Paraguajt,
Brazilit, ku misionarët jezuitë u dhanë mësime muzike popujve Guarani, duke mësuar
shumë edhe nga traditat e tyre.
Pyetje: - Ç’mund të na thoni për rolin,
që luan muzika në veprimtarinë ungjillëzuese?
Përgjigje: - Tepër të
rëndësishëm. Ishte bërë një nga mjetet, që afronte gjuhësisht botën e Perëndimit dhe
përshpirtërinë e Perëndimit të krishterë me këto popullsi të reja, duke u dhuruar,
së bashku me Lajmin e Mirë, edhe pasurinë e një përqafimi universal, të cilin muzika
di ta japë si moskush, me gjuhën e tingujve, që e kuptojnë të gjithë.
Pyetje:
- Ndërmjet protagonistëve më në zë të edicionit tuaj 2011 është edhe Daniel Harding,
drejtor, në këtë rast, i filarmonisë së La Scalës, me një program të veçantë...
Përgjigje:
- I kërkova Daniel Hardingut në këtë Festival, të na sjellë simfoninë e Botës
së Re. M’u duk si vulë e natyrshme për një veprimtari muzikore evropiane, pse desha
të tingëllojë në të humori muzikor, krejt i panjohur, i kësaj bote, ku ndjehet fort
malli i ardhacakëve, për ritmet e meloditë e atdheut të largët.
Pyetje:
- A mund të na e përmblidhni me dy fjalë, këtë festë muzikore, si drejtor artistik
i saj?
Përgjigje: - Një itinerar, një udhëtim; në këtë rast, udhëtim
drejt tokave që, në këndvështrimin e kulturës muzikore, për ne janë toka të panjohura.
Natyrisht ‘na ka pushtuar’ muzika amerikane, por nuk dimë gjë prej gjëje si u krijua,
madje, si u krijuan traditat e ndryshme muzikore amerikane, e as se u krijuan pikërisht
përmes shartimeve të muzikës evropiane mbi atë të Botës së re, e anasjelltas.