Շաբաթ, 11 յունիս 2011-ի երեկոյեան,Մեծի Տանն Կիլիկիոյ կաթողիկոսութեան «Շնորհալի» երգչախումբը
իր տարեկան ելոյթը ունեցաւ Ազգային Եղիշէ Մանուկեան քոլեճի «Սիրան Մանուկեան» հանդիսասրահին
մէջ, կազմակերպութեամբ՝ Հայ եկեղեցւոյ համալսարանական ուսանողներու միութեան: Համերգը
որ տեղի ունեցաւ հովանաւորութեամբ եւ ներկայութեամբ Արամ Ա. կաթողիկոսին: Յայտագիրը
կ՝ընդգրկէր Եկեղեցական շարականներ ու մեղեդիներ. ու նաեւ ազգային հայրենասիրական երգեր
Խումբին ղեկավարն էր, Թորգոմ վրդ. Տօնոյեան, որ Հայաստանի մէջ կարճ ժամանակ հետեւելով
երաժշտական դասընթացքի, իր գիտութիւնը ճոխացուցած ի սպաս կը դնէր կաթողիկոսարանի երգչախումբի
որակի բարձրացման: Ի դէպ երգչախումբի երգիչ-երգչուհիները, որոնք կամաւորաբար մաս կը
կազմեն «Շնորհալի»ին, կրցան իրենք զիրենք գերազանցելու փորձ կատարել` հետեւելով իրենց
գեղարուեստական ղեկավարին ցուցմունքներուն:
Արամ Ա. կաթողիկոս այս առթիւ
իր գնահատանքի ու օրհնութեան խօսքին ընթացքին շեշտեց «Շնորհալի» երգչախումբին յատուկ
տեղը Մեծի Տանն Կիլիկիոյ կաթողիկոսութեան առաքելութեան մէջ: Կաթողիկոսարանի տարբեր բաժանմունքներու
աշխատանքին հետ, Մայր տաճարին մէջ մատուցուող սուրբ պատարագներէն սկսեալ մինչեւ երգարուեստի
ճամբով հայ մշակոյթի տարածման ազդակ ու միջոց նկատեց վեհափառը «Շնորհալի»ն, որ շուրջ
40 տարիներէ ի վեր Կիլիկիոյ կաթողիկոսութեան ճամբով կամաւոր ծառայութեան լծուած է: Երաժշտութիւն
մը միայն ճիշդ երգելը կամ նուագելը չէ՛, ըսաւ Արամ Ա. այլեւ` ոգիի ու ազգային պատմութեան
հարազատ ապրումն է: Ես ուրախ եմ, որ լիբանանահայութեան կեանքին մէջ հայ մշակոյթի ու հայ
երաժշտութեան նկատմամբ բծախնդիր մօտեցում ունինք: Ժողովուրդի կեանքին մէջ մշակոյթը էական
է: Անիկա ձայնի, ձեւի, գոյնի ճամբով անձը կը հրաւիրէ երկրէն երկինք նայելու: Եթէ երգը
կ՛ազնուացնէ մարդը, հապա անոր բարձրորակ կատարումը կը գեղեցկացնէ հոգին» եզրակացուց վեհափառը: Ձեռնարկը
փակուեցաւ «Կիլիկիա» մաղթերգի հաւաքական կատարումով` երգչախումբին ու ժողովուրդին կողմէ: