Papa, në Bazilikën e Shën Gjonit në Lateran, hap Takimin kishtar dioqezan: “Të dëshmohet
me gëzim besimi në Krishtin e ngjallur!”
Sot, në orën 19.30, Benedikti XVI hapi punimet e Takimit kishtar dioqezan, në bazilikën
e Shën Gjonit në Lateran. Takimi mbahet në përfundim të vitit baritor. Tema e sivjetme
është një fragment i shkëputur nga Veprat e Apostujve “Ndjenë si u shporohej zemra.
Gëzimi për lindjen e fesë në Kishën e Romës”. Pikërisht mbi këtë temë, që ka të bëjë
me fillesën e jetës së krishterë, do të reflektojnë së bashku famullitë e kryeqytetit
të Italisë. Sonte, menjëherë pas fjalimit të Papës, imzot Andrea Leonardi, drejtor
i Zyrës katekistike romake dhe i shërbimit për katekumenatin, sintetizoi pyetësorët
mbi temën, të cilëve do t’u përgjigjen të gjithë famullitarët. Për Papën Racinger
është viti i shtatë, që nga zgjedhja në Fronin e Shën Pjetrit, i një shtegtimi të
tillë baritor, që ka për qëllim të gjallërojë jetën e besimtarëve, duke i impenjuar
gjithnjë më shumë në të tëra fushat e jetës së Kishës, gjithnjë në qendër të vëmendjes
së Papës e të papëve. Të ndjekim, prandaj, disa fragmente nga fjalimet e Benediktit
XVI në takimet e viteve të mëparshme dioqezane:
Të dëshmohet me gëzim feja,
në të gjitha fushat e jetës: mund ta përmbledhim me këto fjalë, mandatin që Benedikti
XVI i ka dorëzuar dioqezës së vet këto vite. Në fjalimin e parë, drejtuar një takimi
kishtar dioqezan, një muaj pas zgjedhjes në fronin e Shën Pjetrit, Papa u ndalua posaçërisht
tek transmetimi i fesë në familje, parë si bashkësi e parë e krishterë. Ati i Shenjtë
e lidhi kumtimin e fesë në familje, me mbrojtjen, pa asnjë kusht, të vetë jetës: “Tek
burri e tek gruaja, atësia e amësia, ashtu si trupi e si dashuria, nuk kufizohen
në sferën biologjike: jeta jepet plotësisht, kur, së bashku me jetën, dhurohen edhe
dashuria e ndjenjat, që e bëjnë të mundur pohimin e jetës (Fjalim në Takimin
kishtar dioqezan, 6 qershor 2005). Një vit më pas, Papa vuri në qendër të vëmendjes
të rinjtë dhe sfidën kryesore të edukimit të tyre, duke theksuar se feja e morali
i krishterë “nuk duan t’ia marrin frymën dashurisë, por ta bëjnë vërtet të lirë”: “Posaçërisht
adoleshentët e të rinjtë, të cilët nisin ta ndjejnë me forcë të veçantë në shpirt
zërin e dashurisë, që i thërret, kanë nevojë të çlirohen nga paragjykimi i përhapur
se krishterimi, me urdhërimet e me ndalimet e tij, i krijon shumë pengesa gëzimit
të dashurisë; posaçërisht, të pengon ta shijosh me fund atë lumturi, që burri e gruaja
gjejnë në dashurinë e tyre reciproke” (Fjalim në Takimin kishtar dioqezan,
5 qershor 2006.) E mbi rëndësinë e edukimit të krishterë, Papa reflekton përsëri
në Takimin dioqezan të 2007-tës. Përballë relativizmit e konsumizmit, vëren se është
më se i domosdoshëm një formim sa më i thellë i krishterë: “Konkretisht, ky
shoqërim, duhet t’i bëjë të rinjtë ta prekin me dorë se feja jonë nuk i përket së
kaluarës, se mund të jetohet sot e se, duke e jetuar, gjejmë vërtet të mirën tonë.
Kështu adoleshentët e të rinjtë mund të ndihmohen për t’u çliruar nga paragjykimet
e përhapura e mund të kuptojnë se jeta e krishterë është e realizueshme dhe e arsyeshme,
madje, më e arsyshmja” (Fjalim në Takimin dioqezan , 11 qershor
2007). Për pëkatsinë kishtare, frymën misionare e lutjen, Papa foli në dy takimet
e mëpasme. Ndërsa vitin e kaluar, theksoi në mënyrë të posaçme, binomin Eukaristi-bamirësi.
Ngriti me forcë zërin në thirrjen për ta vënë Eukaristinë në krye të vendit, në jetën
e bashkësive të krishtera. E ripohoi, me të njëjtën forcë, se Mesha duhet përgatitur
e duhet kremtuar me pjesëmarrje të thellë shpirtërore: “I porosis të gjithë
të kujdesen sa më mirë të munden, edhe përmes grupeve të posaçme liturgjike, për përgatitjen
e kremtimit të Eukaristisë, që të gjithë pjesëmarrësit të mund ta takojnë vërtet Zotin”
(Fjalim në Takimin kishtar dioqezan, 15 qershor 2010). Duke u ushqyer me Të,
vijoi Papa, çlirohemi nga leqet e vetdashjes e bëhemi një gjë e vetme. E vetëm kështu
mund të ndjekim logjikën e dhurimit e ta shndërrojmë edhe botën rreth nesh:
“Bamirësia është në gjendje ta shndërrojë me të vërtetë e vazhdimisht shoqërinë, duke
pushtuar mendjet e zemrat e njerëzve e, kur jetohet vërtetësisht, bëhet forca kryesore,
që vë në lëvizje zhvillimin e çdo njeriu e të mbarë njerëzimit”(Fjalim në Takimin
kishtar dioqezan, 15 qershor 2010).