Երեւանի Մէջ Մինսք-ի ԽմբակիՀամանախագահները Հանդիպում Ունեցան Նախագահ Սարգսեանի Հետ։

Հայաստանի նախագահ Սերժ Սարգսեան երէկ ընդունեց շրջանային այցելութեամբ Երեւան ժամանած ԵԱՀԿ-ի Մինսքի խմբակի համանախագահներ Պեռնար Ֆասիէն (Ֆրանսա), Ռոպըրթ Պրատքէն (Միացեալ Նահանգներ), Իկոր Փոփովը (Ռուսիա) եւ ԵԱՀԿ-ի գործող նախագահին անձնական ներկայացուցիչ Անճէյ Քասփրչիքը:
Համանախագահները նախագահ Սերժ Սարգսեանին պատմեցին Պաքուի եւ Ստեփանակերտի մէջ իրենց ունեցած հանդիպումներուն մասին:
Նոյն օրը Հայաստանի արտաքին գործոց նախարար Էդուարդ Նալբանդեան ընդունեց համանախագահները եւ ԵԱՀԿ-ի գործող նախագահին անձնական ներկայացուցիչը:
Հանդիպման ընթացքին քննարկուեցան Քազանի մէջ տեղի ունենալիք եռակողմանի հանդիպման նախապատրաստական աշխատանքները:
ԵԱՀԿ-ի կայքէջին մէջ զետեղուած հաղորդագրութեան համաձայն, Մինսքի խմբակի համանախագահները 6-9 յունիս շրջան կատարած այցելութեան ընթացքին հանդիպումներ ունեցան Ազրպէյճանի նախագահ Իլհամ Ալիեւի, Հայաստանի նախագահ Սերժ Սարգսեանի եւ Լեռնային Ղարաբաղի ղեկավարներուն հետ, քննարկեցին կողմերուն քայլերը, որոնք անհրաժեշտ են տագնապի խաղաղ լուծման հիմնարար սկզբունքներուն շուրջ աշխատանքը աւարտին հասցնելու եւ անոնց վերաբերեալ իրենց աջակցութիւնը յայտնելու համար, ինչպէս կոչ կ՛ուղղուէր նախագահներ Մետվետեւի, Օպամայի եւ Սարքոզիի կողմէ Ֆրանսայի Տովիլ քաղաքին մէջ 26 մայիսի յայտարարութեան մէջ: