Më 20 qershor, në OKB-në e Gjenevës, veprimtaria “i Lumi Vojtila dhe të drejtat të
njeriut”.
“Promovimi i të drejtave të njeriut dhe Gjon Pali II”, është tema e veprimtarisë,
organizuar nga Misioni i përhershëm i Selisë së Shenjtë dhe i Polonisë pranë OKB-së
së Gjenevës, programuar për 20 qershorin e ardhshëm, në selinë e Kombeve të Bashkuara.
Do të flasin një numër i madh personalitetesh kishtare dhe institucionale, Pritet
edhe një mesazh i sekretarit të Shtetit të Vatikanit, kardinalit Tarçizio Bertone.
Pastaj do të shfaqet një film-dokumentar, kushtuar të Lumit Vojtila dhe do të përurohet
ekspozita e pullave postare, me pamje nga shtegtimet apostolike të Gjon Palit II.
Imzot Silvano Tomazi, vëzhgues i përhershëm i Selisë së Shenjtë pranë Kombeve
të Bashkuara, në Gjenevë, në mikrofonin tonë:
Përgjigje: - Kombet
e Bashkuara kanë në Gjenevë, një nga bazat më të rëndësishme të strukturës ndërkombëtare,
që është Këshilli për të drejtat e njeriut. Menduam, prandaj, të vëmë në dukje personalitetin
e Gjon Palit II dhe kontributin e tij në këtë drejtim. Në veprimtari do të theksohet,
në veçanti, se i Lumi i ri e bëri Kishën “vend prej nga dëgjohej zëri i njerëzve pa
zë” të kësaj bote, duke ngritur zërin e tij, që tundi Planetin, në emër të punëtorëve
polakë, të atyre indianë, të fëmijëve të palindur e të mitur... Prandaj edhe meritoi
epitetin “Papa i të drejtave njerëzore”. Duke u nisur nga Enciklika “Pacem in Terris”
e Gjonit XXIII, e posaçërisht, nga mësimet e Koncilit II të Vatikanit, u njohu nënshtetësinë
e plotë, në se mund të shprehemi kështu, të drejtave të njeriut në doktrinën shoqërore
të Kishës. Përmes Gjon Palit II, duam t’i kujtojmë botës se universaliteti i të drejtave
të njeriut, mund të bëhet rruga më e përshtatshme për të siguruar paqen e për të mbrojtur
dinjitetin e të gjithë njerëzve, sidomos, të më të varfërve e të vendeve të pazhvilluara.
E duam të kujtojmë se Gjon Pali II është i gjallë mes nesh, edhe pse Benedikti
XVI çon përpara disa nga idetë e tij themelore, që nisën të vihen në jetë që kur Jozef
Racinger ishte kardinal, në bashkëpunim të plotë me Papën Vojtila.