Бэнэдыкт XVI прыняў даверчыя граматы новых паслоў пры Апостальскай Сталіцы
9 чэрвеня Бэнэдыкт
XVI прыняў даверчыя граматы новага пасла Рэспублікі Малдова пры Апостальскай Сталіцы
спадара Стэфана Горды. Пантыфік адзначыў, што Малдова заўсёды з’яўлялася часткай агульнай
еўрапейскай сям’і народаў і таму пазітыўным з’яўляецца імкненне гэтай краіны да інтэграцыі
ў Еўрапейскі Саюз. “Аднак гэта інтэграцыя не павінна быць абумоўлена толькі фактарамі
эканомікі і дабрабыта. - сказаў Папа - Ідэалізацыя гэтых двух элементаў у мінулым
паказвае пасткі, у якія яны могуць прывесці”. Святы Айцец падкрэсліў, што Малдова
павінна зрабіць уклад у еўрапейскую супольнасць народаў праз захаванне і нясенне хрысціянскіх
каштоўнасцяў.
Бэнэдыкт XVI, таксама звярнуў увагу на добрыя адносіны паміж
Каталіцкім Касцёлам і Праваслаўнай Царквой у Малдове. “Яны разам усведамляюць неабходнасць
абароны рэлігійных і культурных каштоўнасцяў ад пагрозаў матэрыялізма і рэлятывізма”,
- адзначыў Бэнэдыкт XVI.
Пантыфік нагадаў аб праблемах з якімі сустракаецца
Касцёл і грамадства ў краіне. Ён выказаў надзею на пазітыўнае вырашэнне пытанняў звязаных
з вяртаннем канфіскаванай у савецкія часы касцёльнай спадчыны, “якая неабходна для
выканання не толькі рэлігійнай місіі, але таксама дзейнасці ў сферы адукацыі, аховы
здароўя і дабрачыннасці”. “Касцёл не патрабуе прывілегій. - сказаў Святы Айцец - Але
хоча заставацца верным сваёй мэце, крыніцай якой з’яўляецца Хрыстус”.
Бэнэдыкт
XVI прыняў таксама сёння даверчыя граматы новага Надзвычайнага і Паўнамоцнага пасла
Сірыйскай Арабскай Рэспублікі пры Апостальскай Сталіцы. У сваёй прамове да Хусама
Эдзіна Аалы Пантыфік звярнуў увагу на неабходнасць палітычных, эканамічных і сацыяльных
рэформаў, якія б ажыцяўляліся “не ва ўмовах нецярпімасці, дыскрымінацый і канфліктаў,
але з павагай да годнасці чалавека, праўды, законных правоў і атмасферы прымірэння”.
Папа выказаў надзею, што мірнае вырашэнне праблем, якія існуюць у Сірыі будзе знойдзена.
Святы
Айцец сёння прыняў таксама даверчыя граматы новых дыпламатычных прадстаўнікоў Новай
Зеландыі, Ганы, Бэліза і Гвінэі, якія будуць спаўняць сваю місію пры Апостальскай
Сталіцы. У сваёй прамове Святы Айцец нагадаў пра актуальныя праблемы, якія стаяць
перад светам, і якія міжнародная супольнасць павінна вырашаць праз сумесную дзейнасць.
Папа звярнуў увагу на экалагічныя праблемы і этычны кантроль над тэхнічным прагрэсам.
“Улічваючы небяспеку, з якой сустракаецца чалавек з-за бесканрольнага развіцця тэхналогій,
урады павінны спрыяць пашырэнню гуманізма, які будзе паважаць духоўныя і рэлігійныя
аспекты чалавечай асобы”, - сказаў звяртаючыся да новых дыппрадстаўнікоў пры Апостальскай
Сталіцы Бэнэдыкт XVI.