Më 9 qershor përkujtojmë trembëdhjetë vjetorin e vdekjes së kardinalit Agostino Kazaroli,
protagonistit të Ostpolitikës
Trembëdhjetë vjet më parë, si sot, më 9 qershor 1998, shuhej në Vatikan, në moshën
83 vjeçare, kardinali Agostino Kazaroli, protagonist në detyrën e Sekretarit të Shtetit,
i së ashtuquajturës Ostpolitik të Selisë së Shenjtë. Fjala është për dialogun e Kishës
Katolike me regjimet komuniste në vitet para rënies së Murit të Berlinit. Sot, kardinali
Anxhelo Sodano, dekan i Kolegjit Kardinalor, kryesoi Meshën e Shenjtë për shpirtin
e imzot Kazarolit në Bazilikën e Shenjtërve Apostuj në Romë. Nesër, kardinali Kazaroli
do të kujtohet në një kuvend në Sallën e Sinodit në Vatikan, të cilin do ta hapë kardinali
Tarçizio Bertone, Sekretari aktual i Shtetit. Natyrisht, nga Ostpolitika ishte
krejtësisht e përjashtuar Shqipëria enveriane, e cila kishte vendosur ta mohonte Zotin
me Kushtetutë e ta persekutonte këdo që e zinte në gojë, apo i shërbente. Përsa i
përket kardinalit Kazaroli, jo të gjithë ipeshkvijtë e Lindjes ishin dakord me nismat
e tij diplomatike, por mbetet i pamohueshëm vullneti i tij i mirë për të siguruar
atë çka ishte e mundur për Kishën e Lindjes, në një kohë kur mbretëronte Lufta e Ftohtë.
I kërkuam një mendim për kardinal Agostino Kazarolin, atij që ishte për vite me radhë
bashkëpunëtori i tij më i ngushtë, kardinalit Akile Silvestrini: Duhet të mendojmë
se kur ai filloi në vitin 1963, sapo kishte nisur Koncili ekumenik i Vatikanit II
dhe Papa Gjoni XXIII donte që të vinin ipeshkvijtë e Lindjes. Kazaroli shkoi të takonte
kardinalin Mindszenti, që ishte refugjat në ambasadën e SHBA-ve pas falimentimit të
revoltës hungareze më 1956. Shkoi edhe të shihte kardinalin Beran, i cili qëndronte
në një vend të fshehtë, nga ku i kishte shkruar Papës një letër, ku e pyeste: “Ç’të
bëjmë për Kishën tonë?”. Takimi i Kazarolit me Beranin hapi mundësinë për t’u marrë
me Çekosllovakinë. Më pas, i gjithë impenjimi i tij në negociatat plot durim me Jugosllavinë,
Hungarinë, Bullgarinë, Çekosllovakinë për të rilidhur marrëdhëniet, që ishin ndërprerë
krejtësisht. Element tjetër i Ostpolitikës ka qenë Konferenca e Helsinkit, e nxitur
dhe e kultivuar prej tij. Propozimi pat ardhur nga Lindja dhe kardinali Kazaroli e
pati kuptuar se nëse Selia e Shenjtë do të hynte me të drejta të plota ndër shtetet
anëtare të Konferencës së Helsnikit, do të kishte më legjitimitet në çdo negociatë,
rast për rast. Pra, kjo pjesëmarrje, që filloi më 1972 dhe u kurorëzua me nënshkrimin
e Dokumentit përfundimtar, hartuar nga kardinal Kazaroli, në Helsinki më 1975, dha
mundësinë më pas të bëheshin vizita, negociata e të lidheshin kontakte në të gjitha
vendet. Kujtojmë se Shqipëria i nënshkroi aktet e Konferencës së Helsinkit
vetëm në vitin 1990. Në të bëhej fjalë për sigurinë në Evropë; për bashkëpunimin ekonomik,
shkencor, teknik e ambiental; dhe për të drejtat e njeriut.